UrduLead UrduLead
Related Articles
پنجاب کے دارالحکومت لاہور سمیت مختلف شہروں میں بھارت کے 3 جاسوس ڈرون تباہ کرد یے گئے، سندھ کے شہر ڈہرکی میں ڈرون کھیت میں گر کر تباہ ہوا، جس کے نتیجے میں باپ جاں بحق اور بیٹا زخمی ہوگیا۔
پولیس حکام نے بتایا کہ لاہور میں والٹن روڈ پر ایئرپورٹ کے قریب 5 سے 6 فٹ کی پیمائش کا ڈرون سرحد پار سے آپریٹ کیا جارہا تھا، جسے پولیس نے جدید ٹیکنالوجی کے ذریعے جام کرکے مار گرایا، یہ بھارتی ڈرون حساس مقامات کی جاسوسی کے لیے اڑایا گیا تھا۔
گوجرانوالہ کے کھیتوں سے ڈرون ملا ہے، پولیس نے گاؤں پیر جھنڈ کے کھیتوں سے ڈرون کاملبہ قبضے میں لیا ہے، اور ڈرون کی ساخت کے متعلق تحقیقات شروع کردی ہے۔
چکوال کے تھانہ ڈوہمن کی حدود میں مبینہ طور پر بھارت کا جاسوس ڈرون کھیتوں میں گر کر تباہ ہوگیا، پی اے ایف کے ماہرین کی ٹیم موقع پر پہنچ گئی، ڈرون طیارے کی شناخت کے لیے معائنہ کیا جا رہا ہے، قانون نافذ کرنے والےاداروں نے علاقے کو چاروں طرف سے سیل کر دیا ہے۔
پولیس حکام کا کہنا ہے کہ ڈرون گرنے سے کوئی جانی نقصان نہیں ہوا، ڈرون کے ملبے کو قبضے میں لے کر تحقیقات کا آغاز کردیا ہے، واقعے کی اطلاع ملتے ہی سیکیورٹی ادارے موقع پر پہنچ گئے تھے۔
سندھ کے ضلع گھوٹکی کی تحصیل ڈہرکی میں ڈرون کھیت میں گر کر تباہ ہوگیا، ڈرون صبح 4 بجے گرا، جس کے نتیجے میں زوردار دھماکا سنا گیا، اس واقعے میں 2 کسان زخمی ہوئے، جن میں سے ایک مختیار احمد (والد) دم توڑ گیا، جب کہ (بیٹا) عیدن زخمی ہوا ہے۔
واقعہ بھارت کی سرحد سے متصل تھانہ کھنجو کی حدود سرفراز لغاری کے علاقے میں پیش آیا، ایس ایس پی گھوٹکی ڈاکٹر سمیع اللہ سومرو نے واقعے کی تصدیق کی ہے۔
واضح رہے کہ 22 اپریل 2025 کو پہلگام میں سیاحوں کی ہلاکت کے بعد بھارت نے 6 اور 7 مئی کی درمیانی شب، اندھیرے میں پاکستان کے شہری علاقوں پر حملہ کرکے طبل جنگ بجادیا تھا۔
بھارتی حملے کے بعد پاکستان کی مسلح افواج نے بزدلانہ حملے کا منہ توڑ جواب دیتے ہوئے بھارتی فضائیہ کے 3 رافیل طیاروں سمیت 5 جنگی طیارے مارے گرائے، جب کہ ایک بریگیڈ ہیڈکوارٹر سمیت متعدد فوجی چیک پوسٹوں کو تباہ کردیا تھا، بھارتی فوج نے ایل اوسی کے چورا کمپلیکس پر سفید جھنڈ الہرا کر شکست تسلیم کرلی تھی۔
اس کے علاوہ قومی سلامتی کمیٹی نے پاک فوج کو جوابی کارروائی کے لیے اجازت اور مکمل اختیارات دے دیے ہیں، پاکستان نے بھارت کے حملے کا بھرپور جواب دینے کے عزم کا اظہار کیا ہے
