UrduLead UrduLead
Related Articles
پارلیمنٹ کا مشترکہ اجلاس آج جمعہ کو دن 11 بجے طلب کر لیا گیا ہے جس میں پاکستان پیپلز پارٹی (پی پی پی) بھی شرکت کرے گی۔ اجلاس میں اہم قانون سازی متوقع ہے۔
پارلیمانی ذرائع کے مطابق صدر مملکت آصف علی زرداری نے آئین پاکستان کے آرٹیکل 54 کی شق (1) کے تحت یہ مشترکہ اجلاس طلب کیا ہے۔ قومی اسمبلی سیکرٹریٹ نے باقاعدہ نوٹیفکیشن جاری کر دیا ہے۔
اس سے قبل مشترکہ اجلاس میں مجوزہ قانون سازی پر مسلم لیگ (ن) اور اتحادی پیپلز پارٹی کے درمیان اختلافات تھے اور ایک صفحے پر نہیں تھے۔ تاہم وزیر قانون اعظم نذیر تارڑ، سید نوید قمر، اعجاز جاکھرانی اور دیگر رہنماؤں کی مشاورت سے معاملات طے پا گئے ہیں۔
ذرائع کے مطابق پیپلز پارٹی کے ارکان نے پارلیمنٹ ہاؤس میں شیری رحمان کے چیمبر میں مشاورت کی۔ پیپلز پارٹی کو دانش سکولز سمیت متعدد بلز پر تحفظات تھے جن پر حکومت نے بریفنگ دی اور تحفظات دور کرنے پر اتفاق کیا گیا ہے۔
حکومت نے پی پی کی تجویز کردہ ترامیم شامل کرنے کی رضامندی ظاہر کی ہے۔دوسری جانب متحدہ قومی موومنٹ (ایم کیو ایم) کے ارکان اسمبلی بھی مجوزہ قوانین پر مشاورت کے لیے رانا ثناء اللہ سے ملاقات متوقع ہے۔
حکومت اتحادی جماعتوں کو اعتماد میں لے کر تمام تحفظات دور کرنے کا عزم رکھتی ہے۔یہ اجلاس حالیہ سیاسی مشاورتوں کے بعد طلب کیا گیا ہے اور قانون سازی کے عمل میں اتحادیوں کے درمیان ہم آہنگی کی عکاسی کرتا ہے۔
