UrduLead UrduLead
Related Articles
وزیراعظم شہباز شریف کی زیر صدارت وفاقی کابینہ کے اجلاس میں اسلام آباد میں شیڈول بلدیاتی انتخابات کو ایک بار پھر ملتوی کرنے کی منظوری دے دی گئی۔
کابینہ نے اسلام آباد میں پنجاب طرز کے بلدیاتی نظام کی قانون سازی کی بھی منظوری دی اور اس سلسلے میں اسلام آباد کیپیٹل ٹیریٹری لوکل گورنمنٹ (ترمیمی) آرڈیننس 2025 لانے کا فیصلہ کیا، جس کے ذریعے وارڈز کی تعداد میں اضافہ کیا جائے گا۔
اجلاس میں چیف کمشنر اسلام آباد نے کابینہ کو بلدیاتی انتخابات سے متعلق تفصیلی بریفنگ دی۔ کابینہ نے کابینہ کمیٹی برائے قانون سازی کے 3 دسمبر اور 30 دسمبر کے اجلاسوں کے فیصلوں کی توثیق کی۔
اس کے علاوہ اقتصادی رابطہ کمیٹی کے 26 اگست کے فیصلوں اور آف گرڈ لیوی سے متعلق بجلی تقسیم کار کمپنیوں کے صارفین کو ریلیف دینے کے اقدامات کی بھی توثیق کی گئی۔ آف گرڈ لیوی ایکٹ 2025 میں ترمیم کے لیے صدارتی آرڈیننس جاری کرنے کی کارروائی کی منظوری بھی دی گئی۔
وزیراعظم شہباز شریف نے اجلاس سے خطاب کرتے ہوئے پی آئی اے کے 75 فیصد شیئرز کی نجکاری کو انتہائی کامیاب قرار دیا اور کہا کہ بڈنگ کا عمل مکمل طور پر شفاف رہا۔ انہوں نے کہا کہ خسارے میں چلنے والے ریاستی اداروں کی نجکاری حکومت کے معاشی اصلاحاتی وژن کا اہم حصہ ہے اور پی آئی اے کی نجکاری اس سلسلے میں ایک سنگ میل ہے۔
ان کا مزید کہنا تھا کہ رواں مالی سال کی پہلی سہ ماہی میں جی ڈی پی گروتھ میں خاطر خواہ اضافہ خوش آئند ہے اور حکومت نے ملک کو ڈیفالٹ کے دہانے سے نکال کر معاشی استحکام کی طرف گامزن کیا ہے۔
وزیراعظم نے متحدہ عرب امارات کے صدر شیخ محمد بن زاید النہیان اور سعودی ولی عہد محمد بن سلمان سے حالیہ ملاقاتوں اور ٹیلیفونک رابطے کا ذکر کرتے ہوئے کہا کہ یہ بات چیت دوطرفہ تعلقات اور معاشی تعاون کے لیے انتہائی مفید رہی۔
