UrduLead UrduLead
Related Articles
سٹریٹ موومنٹ شروع کرنے کی ہدایت جاری
پاکستان تحریک انصاف (پی ٹی آئی) کی رہنما اور بانی پی ٹی آئی عمران خان کی بہن علیمہ خان نے کہا ہے کہ پارٹی کا جو بھی لیڈر مذاکرات کی بات کرتا ہے، وہ نہ تو بانی پی ٹی آئی کی پارٹی کا حصہ ہے اور نہ ہی ان کا ساتھی۔
انہوں نے واضح کیا کہ عمران خان نے خیبر پختونخوا کی قیادت کو سٹریٹ موومنٹ شروع کرنے کا پیغام دے دیا ہے۔
علیمہ خان کا کہنا تھا کہ عمران خان نے مذاکرات کی تجویز کو ایک بار پھر مسترد کر دیا ہے اور حکومت سے معافی کے بغیر کوئی بات چیت نہیں ہوگی۔
انہوں نے تحریک تحفظ آئین کی دو روزہ کانفرنس کے اعلامیہ کے بارے میں کہا کہ ہمیں اس کا کوئی علم نہیں ہے۔
واضح رہے کہ گزشتہ روز یہ بات سامنے آئی تھی کہ عمران خان کے سماجی رابطے کی ویب سائٹ ’’ایکس‘‘ پر جاری کردہ تازہ ترین بیان نے عملاً محمود خان اچکزئی کی جانب سے مذاکرات کی اپیل کو مسترد کر دیا ہے۔
پی ٹی آئی کے سیکرٹری اطلاعات نے بھی واضح کیا کہ احتجاجی تحریک سے متعلق عمران خان کی ہدایت ہی حتمی ہوگی اور اسی پر عمل درآمد کیا جائے گا۔
علیمہ خان کے اس بیان نے پی ٹی آئی کے اندر مذاکرات کی بحث کو مزید گرم کر دیا ہے، جہاں کچھ رہنما بات چیت کی حمایت کر رہے ہیں جبکہ عمران خان کا خاندان اور قریبی حلقہ سٹریٹ موومنٹ پر زور دے رہا ہے۔
پارٹی ذرائع کا کہنا ہے کہ یہ بیان پارٹی کی صفوں میں اتحاد کو مضبوط کرنے کا پیغام ہے۔
