UrduLead UrduLead
Related Articles
ورلڈ بینک نے پاکستان کے 10 سالہ ترقیاتی پروگرام کے لیے اپنی مکمل حمایت کا دوبارہ اعادہ کیا ہے۔ یہ اعلان سعودی عرب میں منعقد ہونے والی الولا کانفرنس برائے ابھرتی ہوئی مارکیٹ اکانومیز کے موقع پر ہوا۔
وفاقی وزیر خزانہ محمد اورنگزیب نے کانفرنس کے دوران ورلڈ بینک کی منیجنگ ڈائریکٹر اینا بجرڈ سے ملاقات کی۔ ملاقات میں پاکستان کی معاشی ترجیحات، کنٹری پارٹنرشپ فریم ورک اور ابھرتی ہوئی معیشتوں کے سامنے درپیش چیلنجز اور مواقع پر تفصیلی بات چیت ہوئی۔
دونوں فریقین نے توانائی، تعلیم، صحت، موسمیاتی تبدیلی سے نمٹنے اور مالیاتی اصلاحات سمیت اہم شعبوں میں تعاون بڑھانے پر اتفاق کیا۔
اینا بجرڈ نے پاکستان کے لیے مجوزہ 20 ارب ڈالر کے 10 سالہ ترقیاتی پروگرام کی حمایت کا اعادہ کرتے ہوئے کہا کہ اس پروگرام کے مثبت اثرات کو زیادہ سے زیادہ حاصل کرنے کے لیے موثر اور بروقت عمل درآمد انتہائی ضروری ہے۔
وفاقی وزیر خزانہ محمد اورنگزیب نے ورلڈ بینک کے ساتھ قریبی اور پائیدار تعاون کے عزم کا اظہار کیا۔ انہوں نے یقین دلایا کہ وفاقی وزارتوں کی جانب سے مکمل تعاون فراہم کیا جائے گا۔
انہوں نے یہ بھی زور دیا کہ پروگرام کی کامیابی کے لیے صوبائی حکومتوں کا فعال کردار اور بہتر کوآرڈینیشن ناگزیر ہے تاکہ منصوبوں پر بروقت عمل درآمد یقینی بنایا جا سکے۔
یہ ملاقات پاکستان کی معاشی بحالی اور طویل مدتی ترقی کے لیے بین الاقوامی مالیاتی اداروں کے ساتھ تعلقات کو مزید مضبوط کرنے کی جانب ایک اہم پیش رفت سمجھی جا رہی ہے۔
