UrduLead UrduLead
Related Articles
پاکستانی ڈرامہ انڈسٹری کا موجودہ سب سے مقبول اور سب سے زیادہ دیکھا جانے والا پرائم ٹائم ڈرامہ ‘میری زندگی ہے تو’ (Meri Zindagi Hai Tu) ناظرین کی بے پناہ محبت اور توجہ حاصل کر رہا ہے۔
اے آر وائی ڈیجیٹل پر نشر ہونے والے اس ڈرامے کے ہر ایپی سوڈ کو یوٹیوب پر لاکھوں، بلکہ کروڑوں ویوز مل رہے ہیں اور ٹی آر پیز بھی انتہائی بلند ہیں۔ اب تک 27 سے زائد ایپی سوڈز نشر ہو چکے ہیں اور ڈرامہ تیزی سے 1 ارب سے زائد ویوز کا سنگ میل عبور کر چکا ہے۔
ڈرامے میں بلال عباس خان اور ہانیہ عامر مرکزی کرداروں میں نظر آ رہے ہیں۔ کہانی کامیار اور عائرہ کے پیچیدہ اور جذباتی عشقیہ رشتے کے گرد گھومتی ہے۔ رائٹر رادین شاہ اور ڈائریکٹر مصدق ملک کی یہ کاوش ناظرین کو شدید متاثر کر رہی ہے۔
حال ہی میں رائٹر رادین شاہ نے فوشیا میگزین کے یوٹیوب شو ‘گپ شپ ود فوشیا’ میں خصوصی انٹرویو دیا جہاں انہوں نے کامیار کے کردار کے پیچھے کی سوچ، الکوحل کے استعمال اور دیگر تنقید کا جواب دیا۔رادین شاہ نے کہا کہ “ہم ہر ڈرامہ سوشل میسج کے لیے نہیں بناتے۔
‘میری زندگی ہے تو’ خالص تفریح کے لیے ہے۔ میں ڈراموں کے ذریعے سوشل میسج دینے کا شوقین نہیں ہوں۔ ہم سب انسان ہیں، ہم میں خوبیاں بھی ہیں اور خامیاں بھی۔ کامیار ایک عام انسان ہے، کامل نہیں۔ وہ اپنی منفی پہلو کو چھپاتا نہیں بلکہ کھل کر دکھاتا ہے۔
“کامیار کے کردار پر بات کرتے ہوئے انہوں نے بتایا کہ عائرہ کی طرف سے تھپڑ کھانے کے باوجود کامیار کا اس کی طرف متوجہ ہونا معاشرے میں غیر معمولی ہے اور اس کے سنگین نتائج ہو سکتے ہیں، لیکن ڈرامے میں یہ دکھایا گیا ہے کہ کامیار اپنی زندگی میں ایک روٹین میں پھنسا ہوا تھا جہاں سب اس کے پاس آتے تھے۔
عائرہ کی بے اعتنائی نے اسے چونکا دیا۔ “عائرہ اس کے لیے سسٹم کو جھٹکا دینے والی چیز ہے۔”
الکوحل کے بار بار دکھائے جانے پر رادین شاہ نے وضاحت کی کہ “ہم الکوحل کو تباہی کے طور پر دکھا رہے ہیں۔ جب کوئی نشے میں ہوتا ہے تو غلط فیصلے کرتا ہے اور حواس کھو دیتا ہے۔ یہ بالکل پروموٹ نہیں کیا جا رہا بلکہ اس کی بربادی کو اجاگر کیا گیا ہے۔
“انہوں نے مزید کہا کہ کامیار بری پیرنٹنگ کا نتیجہ ہے اور اس کے سفر میں بہتری کی گنجائش بھی دکھائی گئی ہے۔ وہ غلطیاں کرتا ہے، کوشش کرتا ہے اور انسانوں کی طرح ترقی کی طرف بڑھتا ہے۔
‘میری زندگی ہے تو’ نہ صرف ٹی وی پر بلکہ یوٹیوب پر بھی ریکارڈ توڑ ویوز حاصل کر رہا ہے اور ناظرین اسے پاکستان کا سب سے زیادہ پسندیدہ ڈرامہ قرار دے رہے ہیں۔
رادین شاہ کا یہ انٹرویو ڈرامے کے پیچھے کی تخلیقی سوچ کو سمجھنے میں مددگار ثابت ہو رہا ہے
