UrduLead UrduLead
Related Articles
اسٹیٹ بینک آف پاکستان (ایس بی پی) کے جاری کردہ تازہ اعداد و شمار کے مطابق آئندہ 12 ماہ کے دوران پاکستان کو بیرونی قرضوں کی 31.69 ارب ڈالر کی ادائیگیاں کرنا ہوں گی۔
یہ معلومات اکتوبر 2025 تک کے بیرونی قرضوں کی میچورٹی پروفائل کی بنیاد پر جاری کی گئی ہیں۔
اسٹیٹ بینک کی رپورٹ کے مطابق ملک کو زرمبادلہ کے ذخائر پر شدید دباؤ کا سامنا ہے، کیونکہ مقررہ مدت میں واجب الادا ادائیگیاں دستیاب سرکاری ذخائر سے کہیں زیادہ ہیں۔
اعداد و شمار کے مطابق ایک ماہ کے اندر پاکستان پر 1.86 ارب ڈالر کی فوری ادائیگی لازم ہے، جب کہ یہ دباؤ دو سے تین ماہ کے عرصے میں نمایاں طور پر بڑھ کر 8.73 ارب ڈالر تک پہنچ جاتا ہے۔
سب سے زیادہ بوجھ تین سے بارہ ماہ کے درمیان ہے، جہاں پاکستان کو 21.10 ارب ڈالر کی خطیر رقم ادا کرنا ہوگی۔
رپورٹ کے مطابق مجموعی 31.69 ارب ڈالر میں سے 28.13 ارب ڈالر اصل رقم (پرنسپل) کی ادائیگی ہے، جب کہ 3.56 ارب ڈالر سود کی مد میں واجب الادا ہیں۔
ادائیگیوں کے مقابلے میں ملک کے مجموعی سرکاری زرمبادلہ ذخائر 31 اکتوبر 2025 تک 24.03 ارب ڈالر ریکارڈ کیے گئے۔ ان ذخائر میں 8.72 ارب ڈالر غیر ملکی کرنسی کے ذخائر، 8.35 ارب ڈالر کے سونے کے ذخائر اور 6.81 ارب ڈالر دیگر ذخائر کی مد میں شامل ہیں۔
غیر ملکی کرنسی کے ذخائر میں 140.89 ملین ڈالر مالیت کے ایس ڈی آرز (SDRs) اور آئی ایم ایف کے ساتھ 0.16 ملین ڈالر کا ریزرو پوزیشن بھی شامل ہے۔ اس کے علاوہ اسٹیٹ بینک کے پاس دیگر مرکزی بینکوں، بینک فار انٹرنیشنل سیٹلمنٹ (BIS) اور آئی ایم ایف کے پاس 3.35 ارب ڈالر کے ڈپازٹس موجود ہیں۔
ایس بی پی نے فارورڈ اور فیوچر کرنسی پوزیشنز سے متعلق بھی اعداد و شمار جاری کیے ہیں، جن کے مطابق مرکزی بینک کی مجموعی نیٹ شارٹ پوزیشن 2.08 ارب ڈالر ہے، جب کہ طویل پوزیشنز کا مجموعی حجم 290 ملین ڈالر بنتا ہے۔ ان میں 151 ملین ڈالر ایک ماہ کے اندر اور 139 ملین ڈالر ایک سے تین ماہ کے اندر میچور ہونے والی پوزیشنز شامل ہیں، جو بڑے شارٹ والیوم کے مقابلے میں محدود سہارا فراہم کرتی ہیں۔
