UrduLead UrduLead
Related Articles
قائم مقام گورنر پنجاب ملک احمد خان نے ہتک عزت کا بل منظور کرلیا۔
قائم مقام گورنر نے ہتک عزت بل 2024 کے مسودے پر دستخط کردیے، بل کو واپس پنجاب اسمبلی بھجوا دیا گیا ہے۔
ہتک عزت بل گزٹ نوٹیفکیشن کے بعد نافذ العمل ہوجائے گا۔
واضح رہے کہ گورنر پنجاب سردار سلیم حیدر نے بل واپس نہیں بھیجا تھا اور بل گورنر ہاؤس کی فائل میں موجود تھا تاہم قائم مقام گورنر کے آنے کے بعد بل دوبارہ ان کی ٹیبل پر آیا اور ملک احمد خان نے اس پر دستخط کردیے۔
24 مئی کو پنجاب کے گورنر سردار سلیم حیدر نے پنجاب ہتک عزت بل، 2024 کو مزید مشاورت اور نظرثانی کے لیے اسمبلی میں واپس بھیجنے کا امکان ظاہر کردیا۔
جیو نیوز پر اس معاملے کے بارے میں بات کرتے ہوئے گورنر پنجاب سے اس امکان کے بارے میں سوال کیا گیا کہ کیا وہ اس بل کو دوبارہ اسمبلی میں نظرثانی کے لیے بھیج سکتے ہیں؟
انہوں نے جواب دیا کہ یقینی طور پر ایک امکان موجود ہے کہ میں صوبائی حکومت سے کہوں گا کہ وہ بل پر نظرثانی کرے اور اسے بہتر کرنے کی کوشش کرے۔
سردار سلیم حیدر نے کہا کہ انہوں نے ابھی تک بل نہیں دیکھا، لیکن جو کچھ میں نے سنا ہے اور ملک بھر میں ہونے والے تنازعات سے ایسا لگتا ہے کہ بل پر دوبارہ غور کرنے کی ضرورت ہے۔
انہوں نے بتایا کہ بہتر ہوتا کہ معاملے کو جلد بازی میں نہ لایا جاتا اور تمام اسٹیک ہولڈرز کے ساتھ بات چیت کے لیے مقررہ وقت کے بعد بل پیش کیا جاتا۔
تاہم، انہوں نے کہا وہ بل اب پاس ہو چکا ہے لیکن میں پھر بھی کہتا ہوں کہ اس کا مطلب یہ نہیں کہ یہ حتمی لفظ ہے اور اس پر صحافی تنظیموں کے ساتھ بات چیت ہونی چاہیے، تمام اسٹیک ہولڈرز مل بیٹھیں اور دونوں طرف سے مشاورت کے بعد کوئی ایسا راستہ نکالیں جس سے یہ معاملات خوش اسلوبی سے حل ہو سکیں۔
گورنر نے بتایا کہ بل میں کچھ میرٹ ہے، اگر آپ سوشل میڈیا کے اس پہلو کو دیکھیں تو کوئی بھی کسی پر کسی بھی چیز کا الزام لگا سکتا ہے، جس شخص پر الزام لگایا جائے وہ جو چاہے کہہ دے تاہم کوئی بھی اس کی بات سننے کو تیار نہیں ہوتا، انہوں نے مزید کہا کہ یہ بہتر ہوگا کہ اس طرح کے تمام خدشات کو دور کرنے کے بعد بل کو ہینڈل کیا جائے۔
گورنر پنجاب کا کہنا تھا کہ وہ اپنی قانونی ٹیم کے ساتھ بل کا جائزہ لیں گے، یہ میری شدید خواہش ہوگی کہ بل پر دوبارہ نظرثانی کی جائے۔
20 مئی کو پنجاب اسمبلی میں اپوزیشن اور صحافتی تنظیموں کے تحفظات اور احتجاج کے باوجود صوبائی حکومت کا پیش کردہ ہتک عزت بل 2024 منظور کرلیا گیا تھا۔
