UrduLead UrduLead
Related Articles
پاکستانی شوبز کے معروف اداکار سجل علی اور بلال عباس خان ایک نئے ڈرامہ سیریل میں ایک ساتھ جلوہ گر ہوں گے۔
سجل علی اور بلال عباس خان کی جوڑی اس سے قبل ڈراموں اور فلم میں مداحوں کی توجہ حاصل کرچکی ہے۔ دونوں اداکار ’او رنگریزہ‘ اور ’کچھ ان کہی‘ میں ایک ساتھ کام کرچکے ہیں جبکہ فلم ’کھیل کھیل میں‘ میں بھی ان کی جوڑی نظر آئی تھی۔
سجل علی نے ’یقین کا سفر‘، ’الف‘، ’زرد پتوں کا بن‘، ’میں منٹو نہیں ہوں‘ اور ’آنگن‘ سمیت کئی مقبول ڈراموں میں اپنی اداکاری کے جوہر دکھائے ہیں۔ بلال عباس خان بھی ’چیک‘، ’بالا‘، ’ڈنک‘، ’پیار کے صدقے‘، ’عشق مرشد‘ اور ’میری زندگی ہے تو‘ جیسے کامیاب منصوبوں کا حصہ رہ چکے ہیں۔
رپورٹس کے مطابق دونوں اداکار اب جیو ٹی وی کے ایک نئے ڈرامہ سیریل میں مرکزی کردار ادا کریں گے۔ بتایا جارہا ہے کہ یہ ڈرامہ جیو ٹی وی کی اپنی پروڈکشن ہوگا اور اسے ہدایت کار سید وجاہت حسین ڈائریکٹ کریں گے۔
سید وجاہت حسین اس سے قبل ’خائی‘ اور ’کیس نمبر 9‘ جیسے ڈراموں کی ہدایت کاری کرچکے ہیں۔ نئے ڈرامے کی کہانی ثقلین عباس نے لکھی ہے جبکہ معاون کاسٹ کے نام تاحال سامنے نہیں آئے۔
رپورٹس میں نئے ڈرامہ سیریل کو میگا بجٹ پروجیکٹ قرار دیا جارہا ہے۔ سجل علی اور بلال عباس خان کی دوبارہ اسکرین پر واپسی کی خبر نے دونوں کے مداحوں میں خاصی دلچسپی پیدا کردی ہے۔
مداحوں کی جانب سے اس جوڑی کی نئی ڈرامہ سیریل کے حوالے سے مثبت توقعات کا اظہار کیا جارہا ہے۔ کئی مداحوں کا خیال ہے کہ دونوں اداکاروں کی مقبولیت اور حالیہ کامیاب منصوبوں کے باعث یہ ڈرامہ بھی ناظرین میں مقبول ہوسکتا ہے۔
