بارشوں، شہری سیلاب، لینڈ سلائیڈنگ کا الرٹ جاری

پاکستان محکمہ موسمیات (پی ایم ڈی) نے ملک کے مختلف علاقوں میں شدید مون سون بارشوں، شہری سیلاب، لینڈ سلائیڈنگ اور آندھی کے خدشے کے پیش نظر الرٹ جاری کرتے ہوئے شہریوں اور متعلقہ اداروں کو احتیاطی تدابیر اختیار کرنے کی ہدایت کی ہے۔

محکمہ موسمیات کے مطابق اتوار سے پیر کی صبح تک بالائی خیبرپختونخوا، گلگت بلتستان، مری، گلیات اور آزاد کشمیر کے حساس علاقوں میں موسلادھار بارشوں کے باعث لینڈ سلائیڈنگ اور مقامی ندی نالوں میں اچانک طغیانی کا خطرہ ہے۔

پی ایم ڈی نے خبردار کیا ہے کہ اسلام آباد، راولپنڈی، پشاور، نوشہرہ، سیالکوٹ، نارووال، گوجرانوالہ، لاہور اور فیصل آباد میں شدید بارشوں کے باعث شہری سیلاب اور نشیبی علاقوں میں پانی جمع ہونے کا امکان ہے۔

محکمہ موسمیات کے مطابق تیز ہواؤں اور آسمانی بجلی کے باعث کمزور ڈھانچے، سولر پینلز، بجلی کے کھمبے، سائن بورڈز اور دیگر عارضی تنصیبات کو نقصان پہنچ سکتا ہے۔

پی ایم ڈی کا کہنا ہے کہ بحیرہ عرب سے آنے والی مرطوب ہوائیں مسلسل ملک کے بالائی اور زیریں علاقوں میں داخل ہو رہی ہیں جبکہ ایک مغربی ہواؤں کا سلسلہ بھی ملک کے مختلف حصوں پر اثر انداز ہے، جس کے باعث مون سون بارشوں میں شدت متوقع ہے۔

اتوار کے روز کشمیر، خیبرپختونخوا، پنجاب، اسلام آباد اور شمال مشرقی بلوچستان میں گرج چمک کے ساتھ بارش جبکہ بعض مقامات پر موسلادھار بارش کی پیش گوئی کی گئی ہے۔ شام اور رات کے اوقات میں شمال مشرقی بلوچستان اور مغربی سندھ کے چند علاقوں میں بھی بارش کا امکان ہے، جبکہ ملک کے دیگر حصوں میں موسم گرم اور مرطوب رہے گا۔

پیر کے روز بھی کشمیر، خیبرپختونخوا، اسلام آباد، بالائی اور جنوبی پنجاب اور شمال مشرقی بلوچستان میں گرج چمک کے ساتھ بارش کا سلسلہ جاری رہنے کی توقع ہے، جبکہ بالائی علاقوں میں کہیں کہیں شدید بارش ہو سکتی ہے۔ جنوبی سندھ اور بلوچستان کے چند علاقوں میں شام اور رات کے وقت بارش متوقع ہے۔

گزشتہ 24 گھنٹوں کے دوران اسلام آباد، بالائی پنجاب، خیبرپختونخوا، کشمیر اور گلگت بلتستان کے مختلف علاقوں میں بارش ریکارڈ کی گئی۔ سب سے زیادہ بارش خیبرپختونخوا کے کاکول میں 59 ملی میٹر، پنجاب کے حافظ آباد میں 54 ملی میٹر، اسلام آباد کے سیدپور میں 40 ملی میٹر اور سیالکوٹ ایئرپورٹ پر 32 ملی میٹر ریکارڈ کی گئی۔

محکمہ موسمیات کے مطابق گزشتہ روز ملک کا زیادہ سے زیادہ درجہ حرارت سبی اور دادو میں 47 ڈگری سینٹی گریڈ جبکہ موہنجودڑو، شہید بینظیر آباد اور روہڑی میں 46 ڈگری سینٹی گریڈ ریکارڈ کیا گیا۔

پی ایم ڈی نے شہریوں سے اپیل کی ہے کہ غیر ضروری سفر سے گریز کریں، برساتی ندی نالوں اور نشیبی علاقوں سے دور رہیں اور کسی بھی ہنگامی صورتحال میں مقامی انتظامیہ کی ہدایات پر عمل کریں۔