UrduLead UrduLead
Related Articles
سہیل احمد نے دل دہلا دینے والی حقیقت بیان کر دی
معروف کامیڈین سہیل احمد نے انکشاف کیا ہے کہ مرحوم اللہ رکھا پیپسی اپنی بیٹی کی ازدواجی زندگی اور مسلسل مالی دباؤ کے باعث شدید ذہنی اذیت میں مبتلا تھے، جبکہ دل کی بیماری کے باوجود علاج کروانے سے گریز کرتے رہے۔
پاکستان کے معروف کامیڈین اور اسٹیج فنکار اللہ رکھا پیپسی کی اچانک وفات کے حوالے سے سینئر اداکار اور کامیڈین سہیل احمد نے ایک افسوسناک انکشاف کیا ہے، جس نے مداحوں کو غمزدہ کر دیا ہے۔
سہیل احمد نے اپنے پروگرام میں گفتگو کرتے ہوئے بتایا کہ اللہ رکھا پیپسی نہایت خوددار، باصلاحیت اور باوقار انسان تھے، جنہوں نے اپنی پوری زندگی میں کبھی کسی کے سامنے مالی مدد کے لیے ہاتھ نہیں پھیلایا، حالانکہ وہ شدید مالی مشکلات کا سامنا کرتے رہے۔
ان کے مطابق اللہ رکھا پیپسی اپنی بیٹی کی ازدواجی زندگی کی وجہ سے انتہائی پریشان رہتے تھے۔ انہوں نے بتایا کہ ان کے داماد کی جانب سے مسلسل رقم کا مطالبہ کیا جاتا تھا اور مبینہ طور پر ایک موقع پر داماد نے اللہ رکھا پیپسی پر تشدد بھی کیا تھا، جس کے باعث وہ شدید ذہنی دباؤ کا شکار تھے۔
سہیل احمد نے کہا کہ مرحوم اکثر اس بات کا ذکر کرتے تھے کہ وہ داماد کے مسلسل مطالبات پورے کرنے سے عاجز آ چکے ہیں اور اس صورتحال نے ان کی زندگی اجیرن بنا دی تھی۔
انہوں نے مزید انکشاف کیا کہ اللہ رکھا پیپسی کی تدفین کے دوران ایک نوجوان نے انہیں بتایا کہ مرحوم کی بیٹی کو اسی روز طلاق دے دی گئی تھی۔ سہیل احمد کے مطابق یہ خبر سن کر وہ خود بھی شدید رنجیدہ ہوئے اور ان کا خیال ہے کہ ممکن ہے اس صدمے نے اللہ رکھا پیپسی کی پہلے سے خراب صحت کو مزید متاثر کیا ہو۔
سہیل احمد کا کہنا تھا کہ اللہ رکھا پیپسی دل کے عارضے میں بھی مبتلا تھے، تاہم وہ علاج کروانے پر آمادہ نہیں ہوتے تھے۔ ان کے بقول، غالب امکان ہے کہ شو کی ریکارڈنگ سے قبل انہیں اپنی بیٹی کی طلاق کی اطلاع ملی، جس کے کچھ ہی دیر بعد وہ ریکارڈنگ کے دوران دل کا دورہ پڑنے سے انتقال کر گئے۔
واضح رہے کہ اللہ رکھا پیپسی 6 جولائی 2026 کو کامیڈی شو “پبلک ڈیمانڈ” کی ریکارڈنگ کے دوران اچانک گر پڑے تھے اور دل کا دورہ پڑنے کے باعث موقع پر ہی انتقال کر گئے تھے۔ ان کی وفات نے شوبز حلقوں اور مداحوں کو گہرے صدمے سے دوچار کر دیا تھا۔
