UrduLead UrduLead
Related Articles
پنجاب بھر کے سرکاری اور نجی سکول آج سے دوبارہ کھل گئے ہیں۔ موسم سرما کی تقریباً 30 روزہ طویل چھٹیوں کے بعد طلبہ و طالبات آج کلاسز میں واپس لوٹ آئے، جس سے تعلیمی اداروں میں رونق لوٹ آئی ہے۔
محکمہ سکول ایجوکیشن پنجاب کے مطابق موسم سرما کی تعطیلات 20 دسمبر 2025 سے شروع ہوئی تھیں، جو شدید سردی اور موسم کی شدت کی وجہ سے ایک ہفتے تک توسیع دی گئی تھیں۔
ابتدائی طور پر 12 جنوری کو کھلنے کا امکان تھا، مگر صوبائی وزیر تعلیم رانا سکندر حیات نے عوامی رائے اور محکمہ ماحولیات کی رپورٹس کی روشنی میں چھٹیوں کو 18 جنوری تک بڑھایا تھا۔
آج 19 جنوری بروز پیر سے تمام تعلیمی ادارے معمول کے مطابق کام کر رہے ہیں۔ سکولوں کے نئے اوقات کار صبح 8:45 بجے سے دوپہر 1:30 بجے تک مقرر کیے گئے ہیں تاکہ طلبہ شدید سردی سے محفوظ رہیں۔طلبہ اور والدین میں سکول کھلنے پر خوشی کی لہر دوڑ گئی ہے۔
ایک طالب علم نے بتایا کہ “چھٹیاں اچھی گزریں مگر اب پڑھائی کا آغاز ہو گیا ہے، کلاس روم میں دوستوں سے مل کر بہت اچھا لگ رہا ہے۔”
وزیر تعلیم رانا سکندر حیات نے کہا ہے کہ طلبہ کی صحت اور تعلیم دونوں کو ترجیح دی گئی ہے۔ انہوں نے مزید توسیع کے امکانات کو مسترد کرتے ہوئے کہا کہ اب کوئی تبدیلی نہیں ہوگی اور تعلیمی سلسلہ بغیر کسی رکاوٹ کے جاری رہے گا۔
محکمہ تعلیم نے والدین اور طلبہ سے اپیل کی ہے کہ وہ سکول کے نئے شیڈول پر عمل کریں اور گرم لباس کے ساتھ حاضری یقینی بنائیں۔ پنجاب بھر میں لاکھوں طلبہ آج سے نئی تعلیمی سرگرمیوں کا آغاز کر رہے ہیں۔\
