UrduLead UrduLead
Related Articles
پاکستان کرکٹ بورڈ (پی سی بی) نے پاکستان سپر لیگ (پی ایس ایل) کی مقبول فرنچائز ملتان سلطانز کو بھی فروخت کرنے کا حتمی فیصلہ کر لیا ہے۔
ذرائع کے مطابق پی سی بی اب ملتان سلطانز کی اوپن بکنگ (عوامی نیلامی) کرے گا اور اسے جلد از جلد فروخت کرنے کی تیاریاں مکمل کر رہا ہے۔
پی سی بی نے پہلے پی ایس ایل 11 کے لیے ملتان سلطانز کے معاملات خود سنبھالنے کا اعلان کیا تھا، لیکن اب صورتحال تبدیل ہو گئی ہے۔
ذرائع کا کہنا ہے کہ حالیہ آکشن میں پی ایس ایل کی دو نئی ٹیموں (حیدرآباد اور سیالکوٹ) کی فروخت پی سی بی کی توقعات سے کہیں زیادہ کامیاب رہی اور انہیں ریکارڈ قیمتوں پر فروخت کیا گیا۔
غیر ملکی سرمایہ کاروں کی شدید دلچسپی اور بہترین بولیوں کی وجہ سے پی سی بی کو یقین ہو گیا ہے کہ ملتان سلطانز بھی اچھی قیمت پر فروخت ہو سکتی ہے۔
ذرائع نے بتایا کہ پی سی بی کا خیال ہے کہ اب سے بہتر وقت ملتان سلطانز کی فروخت کے لیے نہیں ہو سکتا۔ اس لیے فرنچائز کی اوپن بکنگ کا فیصلہ کیا گیا ہے۔ قانونی اور دیگر پہلوؤں کا جائزہ مکمل ہوتے ہی اس کی باضابطہ تشہیر کی جائے گی اور نیلامی کا عمل شروع ہو جائے گا۔
پی سی بی حکام پرامید ہیں کہ ملتان سلطانز کی خریداری میں کئی مقامی اور غیر ملکی سرمایہ کار دلچسپی ظاہر کریں گے اور یہ فرنچائز بھی ریکارڈ رقم میں فروخت ہو گی۔
واضح رہے کہ پی ایس ایل 11 میں اب آٹھ ٹیمیں شامل ہوں گی، جن میں دو نئی ٹیمیں حیدرآباد اور سیالکوٹ بھی شامل ہیں۔
پی ایس ایل 11 کا ڈرافٹ 30 جنوری کو ہونے کا امکان ہے، جس سے پہلے نئی فرنچائزز کی منظوری اور انتظامی امور مکمل کیے جائیں گے۔یہ فیصلہ پاکستان سپر لیگ کو مزید مضبوط اور پرکشش بنانے کی جانب ایک اہم قدم سمجھا جا رہا ہے۔
