UrduLead UrduLead
Related Articles
وفاقی تحقیقاتی ادارے (ایف آئی اے) نے اسلام آباد ایئرپورٹ پر آف لوڈ اور ڈی پورٹ ہونے والے افراد سے متعلق ایک نیا ہدایت نامہ جاری کر دیا ہے۔
سرکلر میں ایف آئی اے نے واضح ہدایات جاری کی ہیں کہ آف لوڈ یا ڈی پورٹ ہونے والے تمام افراد کی باقاعدہ اور مکمل تلاشی لینا لازمی ہے۔ بغیر تلاشی کے انہیں حوالات میں بند کرنے کا عمل سنگین غفلت قرار دیا گیا ہے۔
سرکلر میں کہا گیا ہے کہ ماضی میں ایسے متعدد واقعات سامنے آئے ہیں جن میں ایف آئی اے عملہ تلاشی لیے بغیر ہی متعلقہ افراد کو حوالات میں بند کر دیتا تھا، جس کے نتیجے میں اہم شواہد غائب ہو جاتے تھے۔
ہدایات کے مطابق اب آف لوڈ یا ڈی پورٹ ہونے والے ہر فرد کا سامان، دستاویزات، موبائل فونز، سگریٹ اور دیگر تمام اشیاء فوری طور پر قبضے میں لے لی جائیں گی اور ان کا مکمل ریکارڈ دستاویزی شکل میں مرتب کیا جائے گا۔
سرکلر میں مزید کہا گیا ہے کہ تمام کارروائی مکمل ہونے کے بعد متعلقہ فرد سے ریکارڈ پر دستخط لازمی لیے جائیں گے۔ اس کے بعد مکمل ریکارڈ متعلقہ ایس ایچ او اور محرر کے حوالے کیا جائے گا تاکہ شفافیت یقینی بنائی جا سکے۔
ایف آئی اے نے اینٹی ہیومن ٹریفکنگ یونٹ کے عملے کو ہدایت کی ہے کہ وہ ان نئی ہدایات پر سختی سے عملدرآمد یقینی بنائیں تاکہ مستقبل میں شواہد کے غائب ہونے کے واقعات کا سلسلہ روکا جا سکے۔
