جاز :مجموعی کارکردگی کے پیچھے کئی تشویشناک پہلو

مالیاتی رپورٹ: منافع میں اضافہ مگر EBIT میں کمی، ڈیجیٹل کاروبار ترقی کا اصل انجن

VEON کی تازہ ترین مالیاتی رپورٹ کے مطابق جاز پاکستان نے 2026 کی دوسری سہ ماہی میں مضبوط آمدنی اور ای بی آئی ٹی ڈی اے (EBITDA) نمو رپورٹ کی ہے، تاہم مجموعی کارکردگی کے پیچھے کئی تشویشناک پہلو بھی سامنے آئے ہیں، جن میں EBIT میں نمایاں کمی، سرمایہ خرچ میں اضافہ، صارفین کی سست رفتار نمو اور ڈیجیٹل قرضوں میں تیزی سے بڑھتا ہوا خطرہ شامل ہیں۔

پاکستان کی مجموعی آمدنی سالانہ بنیاد پر 26.6 فیصد اضافے کے ساتھ 500 ملین ڈالر (تقریباً 139.36 ارب روپے) تک پہنچ گئی، جبکہ EBITDA میں 31.9 فیصد اضافہ ہوا اور یہ 216 ملین ڈالر (60.30 ارب روپے) رہا۔ اس کے برعکس EBIT میں 18.7 فیصد کمی دیکھی گئی، جو 143 ملین ڈالر تک محدود رہا — یہ کمی نیٹ ورک انفراسٹرکچر میں سرمایہ کاری اور 5G کی وسیع تر تیاری کے باعث ڈیپریسی ایشن اور ایمورٹائزیشن کے بڑھتے ہوئے اخراجات کی عکاسی کرتی ہے۔

کیپیٹل اخراجات میں سالانہ بنیاد پر 27.4 فیصد اضافہ ہوا اور یہ 20.43 ارب روپے تک جا پہنچے۔ کمپنی کا کہنا ہے کہ نئے حاصل کردہ اسپیکٹرم کی تنصیب اور 5G میں تیزی لانے کے باعث باقی سال کے دوران یہ اخراجات مزید بڑھیں گے، جس سے نقد بہاؤ پر دباؤ بڑھنے کا امکان ہے۔

ڈیجیٹل کاروبار ترقی کی رفتار میں سب سے آگے

جاز کے ڈیجیٹل کاروبار نے سب سے تیز نمو دکھائی، جس کی آمدنی سالانہ بنیاد پر 45.6 فیصد بڑھ کر 193 ملین ڈالر ہو گئی۔ ڈیجیٹل خدمات اب پاکستان کی کل آمدنی کا 38.7 فیصد ہیں، جو ایک سال قبل 33.6 فیصد تھیں۔ ڈیجیٹل EBITDA میں تقریباً دگنا اضافہ ہوا — 94.2 فیصد بڑھ کر 63 ملین ڈالر تک پہنچا، جبکہ مارجن 24.3 فیصد سے بڑھ کر 32.3 فیصد ہو گیا۔

مالیاتی خدمات کے شعبے نے اس ترقی میں کلیدی کردار ادا کیا۔ اس شعبے کی آمدنی 53.3 فیصد اضافے کے ساتھ 38.97 ارب روپے تک پہنچی، جس میں قرضوں کی تقسیم کے علاوہ ادائیگیوں، مرچنٹ سروسز اور SME حل کی نمو بھی شامل ہے۔

جون 2026 تک JazzCash کے صارفین کی تعداد 2 کروڑ 77 لاکھ تھی، جبکہ گزشتہ 12 ماہ میں لین دین کے حجم میں 57.1 فیصد اضافہ ہوا۔ مجموعی ٹرانزیکشن ویلیو 67.5 فیصد بڑھ کر 19.6 کھرب روپے تک جا پہنچی۔ کمپنی کے مطابق روزانہ 2 لاکھ 24 ہزار سے زائد ڈیجیٹل قرضے جاری کیے جا رہے ہیں، اور فعال مرچنٹ نیٹ ورک 7 لاکھ 35 ہزار سے تجاوز کر چکا ہے۔

تاہم قرضوں میں اس تیز رفتار توسیع سے جاز کا کریڈٹ رسک بھی بڑھ رہا ہے۔ کمپنی کا مجموعی قرضہ پورٹ فولیو سالانہ بنیاد پر 2.2 گنا بڑھ چکا ہے، مگر تازہ رپورٹ میں قرضوں کی نادہندگی یا کریڈٹ نقصانات سے متعلق تفصیلی اعداد و شمار فراہم نہیں کیے گئے۔

روایتی ٹیلی کام کاروبار کی نمو سست

ٹیلی کمیونیکیشن اور انفراسٹرکچر کاروبار میں سالانہ بنیاد پر صرف 17 فیصد اضافہ ہوا اور یہ 307 ملین ڈالر تک پہنچا — جو ڈیجیٹل کاروبار کی 45.6 فیصد نمو کے مقابلے میں کافی کم ہے۔ یہ فرق ظاہر کرتا ہے کہ جاز اب اپنی ترقی کے لیے ڈیجیٹل اور فنٹیک شعبوں پر زیادہ انحصار کر رہا ہے، جبکہ روایتی کنیکٹیویٹی کاروبار معتدل رفتار سے بڑھ رہا ہے۔

موبائل صارفین کی تعداد میں صرف 2.1 فیصد اضافہ ہوا اور یہ 7 کروڑ 54 لاکھ تک پہنچی۔ موبائل ARPU میں 14 فیصد اضافہ ہوا اور یہ 328.6 روپے ہو گیا، جو ظاہر کرتا ہے کہ آمدنی میں زیادہ تر اضافہ صارفین کی تیز رفتار نمو کے بجائے بہتر مانیٹائزیشن اور قیمتوں میں اضافے سے آیا ہے۔

4G صارفین 6.6 فیصد اضافے سے 5 کروڑ 81 لاکھ ہو گئے، جس سے 4G پینیٹریشن 77.1 فیصد تک پہنچ گئی، جبکہ فی صارف اوسط ڈیٹا استعمال 14.4 فیصد بڑھ کر 8.2 جی بی ہو گیا۔ ملٹی پلے صارفین میں محض 2.6 فیصد اضافہ ہوا اور یہ 2 کروڑ 29 لاکھ تک پہنچے، جو ڈیجیٹل آمدنی کی تیز رفتار نمو کے مقابلے میں بنڈلڈ سروسز کی اپنائیت میں نسبتاً کم نمو ظاہر کرتا ہے۔

نئے انشورنس کاروبار کا اضافہ

VEON نے TPL Insurance میں 76.33 فیصد کنٹرولنگ حصص تقریباً 16.4 ملین ڈالر میں حاصل کر کے جاز کے مالیاتی خدمات کے دائرہ کار کو مزید وسعت دی ہے۔ اس معاہدے سے جاز کو ایک ایسا انشورنس کاروبار ملا ہے جس کے پاس موٹر، صحت اور جائیداد کی 2 لاکھ 77 ہزار سے زائد پالیسیاں موجود ہیں۔ اگرچہ یہ اقدام ایمبیڈڈ فنانشل سروسز میں توسیع کا موقع فراہم کرتا ہے، مگر اس سے JazzWorld کے موجودہ پیمنٹس، لینڈنگ اور بینکنگ آپریشنز میں انضمام اور عملدرآمد کے خطرات بھی جنم لیتے ہیں۔

تفریحی پلیٹ فارمز کی بڑی صارفین تعداد برقرار

جاز کا ڈیجیٹل تفریحی کاروبار بھی سرگرم رہا۔ Tamasha نے پاکستان سپر لیگ سیزن کے دوران سہ ماہی کے آغاز پر 4 کروڑ 89 لاکھ صارفین حاصل کیے، جو کھیلوں سے متعلق دلچسپی میں کمی کے باعث سہ ماہی کے اختتام تک 3 کروڑ 87 لاکھ رہ گئے۔ SIMOSA نے 3 کروڑ 38 لاکھ صارفین حاصل کیے، FikrFree کے پالیسی ہولڈرز کی تعداد 1 کروڑ 79 لاکھ رہی، جبکہ پریمیم ڈیجیٹل برانڈ ROX 33 لاکھ صارفین تک پہنچا۔

VEON کے مجموعی نتائج پر دباؤ

پاکستان کی مضبوط کارکردگی کے باوجود VEON کے مجموعی نتائج دیگر خطوں میں کمی اور موازنے کے اثرات سے متاثر ہوئے۔ گروپ نے اس سہ ماہی میں منافع میں سالانہ بنیاد پر 77 فیصد اور ڈائلیوٹڈ فی حصص آمدنی میں 79.6 فیصد کمی رپورٹ کی۔ کمپنی نے اس کمی کی بڑی وجہ غیر معمولی عوامل کو قرار دیا، جن میں 2025 کی دوسری سہ ماہی میں پاکستان ٹاور کی فروخت سے حاصل ہونے والا منافع اور KGL وارنٹس سے متعلق فیئر ویلیو نقصان شامل ہیں۔

اس کے باوجود پاکستان VEON کی ترقی میں اہم شراکت دار رہا، جس نے کمپنی کی 2026 کی مکمل سال کی نظرثانی شدہ رہنمائی کو سہارا دیا — آمدنی میں 15 سے 18 فیصد اور EBITDA میں 9 سے 12 فیصد نمو کا تخمینہ۔

مجموعی طور پر تازہ ترین نتائج جاز کے حوالے سے ملا جلا منظرنامہ پیش کرتے ہیں: ایک طرف آمدنی، EBITDA اور ڈیجیٹل نمو میں مضبوطی ہے، تو دوسری طرف EBIT میں کمی، بڑھتے ہوئے کیپیٹل تقاضے، صارفین کی نسبتاً سست نمو اور ڈیجیٹل قرضوں و نئے مالیاتی کاروبار سے بڑھتا ہوا خطرہ بھی موجود ہے۔