UrduLead UrduLead
Related Articles
سولر صارفین کے لیے بڑی تبدیلی
نیشنل الیکٹرک پاور ریگولیٹری اتھارٹی (نیپرا) نے نیٹ میٹرنگ ریگولیشنز 2026 کا نوٹیفکیشن جاری کر دیا ہے، جس کے تحت ملک بھر میں نیٹ میٹرنگ کا پرانا نظام ختم کر کے نیٹ بلنگ کا نیا نظام متعارف کروا دیا گیا ہے۔
یہ تبدیلی سولر اور دیگر قابل تجدید ذرائع سے بجلی پیدا کرنے والے صارفین (پروسومرز) کے لیے اہم ہے، جو اب اضافی بجلی یونٹ کے بدلے یونٹ کی بجائے کم قیمت پر فروخت کریں گے۔
نئی ریگولیشنز کے تحت نیٹ میٹرنگ صارفین سے نیشنل ایوریج انرجی پرائس (NEP) کے مطابق اضافی بجلی خریدی جائے گی، جو موجودہ ریٹ سے کافی کم ہے (بعض رپورٹس کے مطابق تقریباً 11 روپے فی یونٹ تک کم ہو سکتا ہے، جبکہ پرانا ریٹ 25-26 روپے فی یونٹ تھا)۔
صارفین کو گرڈ سے لی جانے والی بجلی موجودہ رائج ٹیرف کے مطابق ادا کرنی ہوگی۔ اس طرح یونٹ کے بدلے یونٹ کی سہولت ختم ہو گئی ہے۔
نیپرا کے مطابق یہ ریگولیشنز سولر، ونڈ اور بائیو گیس صارفین پر بھی ہوں گی۔ بلنگ سائیکل کے اختتام پر الگ سے بل جاری کیا جائے گا۔ اضافی بجلی کی فراہمی پر صارفین کو سہ ماہی بنیادوں (تین ماہ بعد) ادائیگی کی جائے گی۔
نیٹ میٹرنگ (اب نیٹ بلنگ) کے معاہدوں کی مدت 5 سال تک محدود کر دی گئی ہے، جس کے بعد مزید 5 سال کے لیے تجدید ممکن ہوگی۔یہ نوٹیفکیشن فوری طور پر نافذ العمل ہے اور پرانے نیٹ میٹرنگ ریگولیشنز 2015 معطل کر دیے گئے ہیں۔
موجودہ صارفین کے معاہدوں کی شرائط ختم ہونے تک برقرار رہیں گی، لیکن نئے کنکشنز فوری طور پر نئے نظام کے تحت ہوں گے۔
نیپرا حکام کا کہنا ہے کہ ملک میں 6 ہزار میگاواٹ سے زائد سولر بجلی کی پیداوار ہو چکی ہے، اور یہ تبدیلی گرڈ کے مالیاتی بوجھ کو کم کرنے اور IPPs کی کیپیسٹی پیمنٹس کو متوازن کرنے کے لیے ضروری ہے۔ تاہم، سولر صارفین اور ماہرین اسے سولر انرجی کی ترغیبات کم کرنے اور اپنانے کی رفتار سست کرنے والا قدم قرار دے رہے ہیں۔
نئی پالیسی کے تحت ڈسکوز صارفین کو دو طرفہ میٹر یا الگ میٹر لگانے کا پابند کریں گے۔ ایک کلو واٹ سے ایک میگا واٹ تک سسٹم کی اجازت ہوگی، جبکہ 250 کلو واٹ یا زائد سسٹم کے لیے لوڈ فلو سٹڈی لازمی ہوگی۔
یہ تبدیلی پاکستان میں سولر انرجی کے تیزی سے پھیلاؤ کے بعد آئی ہے، جہاں گزشتہ برسوں میں لاکھوں گھروں نے سولر پینلز لگائے۔
ماہرین کا خیال ہے کہ نئی پالیسی سے سولر انویسٹمنٹ کی معاشیات متاثر ہو سکتی ہے، اور صارفین ہائبرڈ سسٹم (بیٹری اسٹوریج) کی طرف مائل ہو سکتے ہیں۔
