UrduLead UrduLead
Related Articles
پاکستان کرکٹ ٹیم T20 ورلڈ کپ 2026 میں بھارت کے خلاف شیڈولڈ میچ کھیلنے پر آمادہ ہو گئی ہے۔
ذرائع کے مطابق دونوں ٹیمیں گروپ اے کا یہ اہم مقابلہ 15 فروری 2026 کو شیڈول کے مطابق ہی کھیلیں گی۔یہ فیصلہ سری لنکا کے صدر کی ذاتی درخواست کے بعد سامنے آیا ہے۔
سری لنکا کے صدر نے وزیراعظم شہباز شریف سے براہ راست رابطہ کیا اور پاکستان سے مطالبہ کیا کہ وہ بائیکاٹ کا اعلان واپس لے اور بھارت کے خلاف میچ کھیلنے کی اجازت دے۔ اس درخواست کو پاکستان نے سنجیدگی سے لیا اور اعلیٰ سطح پر غور و فکر کے بعد بائیکاٹ ختم کرنے کا اعلان کر دیا۔
یاد رہے کہ چند روز قبل بنگلہ دیش نے بھارت میں جاری T20 ورلڈ کپ 2026 میں شرکت کے دوران سیکیورٹی خدشات کا اظہار کرتے ہوئے وینیوز میں تبدیلی کی درخواست کی تھی۔
آئی سی سی نے اس درخواست کو مسترد کر دیا تو بنگلہ دیش نے احتجاجاً ٹورنامنٹ سے دستبرداری کا اعلان کر دیا۔آئی سی سی نے بنگلہ دیش سے مزید بات چیت کی بجائے فوری طور پر اسے ایونٹ سے نکال کر اسکاٹ لینڈ کو بطور متبادل ٹیم شامل کر لیا۔
اس اقدام پر پاکستان نے شدید تنقید کی اور اسے دہرا معیار قرار دیا۔ پاکستان کرکٹ بورڈ نے بنگلہ دیش کے ساتھ یکجہتی کا اظہار کرتے ہوئے بھارت کے خلاف 15 فروری کا میچ بائیکاٹ کرنے کا اعلان کر دیا تھا، جس سے کرکٹ کی دنیا میں ہلچل مچ گئی تھی۔
بائیکاٹ کے اعلان کے بعد آئی سی سی نے پاکستان کو منانے کے لیے فوری اقدامات کیے۔ اس سلسلے میں آئی سی سی کی ڈپٹی چیئرمین، بنگلہ دیش کرکٹ بورڈ کے صدر اور چیئرمین پاکستان کرکٹ بورڈ محسن نقوی کے درمیان چار گھنٹے سے زائد طویل ملاقات ہوئی۔
ملاقات میں پاکستان کے تحفظات کو دور کرنے کی کوشش کی گئی اور بنگلہ دیش کے ساتھ یکجہتی کے اظہار کو بھی مدنظر رکھا گیا۔اس دوران سری لنکا کے صدر کی طرف سے وزیراعظم شہباز شریف کو کی گئی ذاتی اپیل نے فیصلہ کن کردار ادا کیا۔
پاکستان نے اس درخواست کو عالمی کرکٹ کی بہتری اور خطے میں کھیل کی روح کو برقرار رکھنے کے لیے قبول کر لیا۔
ذرائع کا کہنا ہے کہ پاکستان کرکٹ بورڈ نے ابھی تک باضابطہ طور پر بائیکاٹ واپس لینے کا اعلان نہیں کیا، لیکن اعلیٰ سطح پر فیصلہ ہو چکا ہے کہ ٹیم 15 فروری کو بھارت کے خلاف میدان میں اترے گی۔ یہ میچ کولمبو کے سینہالیز سپورٹس کلب گراؤنڈ میں کھیلا جائے گا۔
اس فیصلے سے T20 ورلڈ کپ 2026 میں پاکستان اور بھارت کے درمیان روایتی مقابلے کی بحالی ہو گئی ہے۔ دونوں ٹیمیں اب گروپ اے میں اپنے باقی میچز بھی مکمل توجہ کے ساتھ کھیلیں گی۔ کرکٹ شائقین اس تاریخی میچ کا شدت سے انتظار کر رہے ہیں۔
