UrduLead UrduLead
Related Articles
پاکستان کی سینیئر اور ورسٹائل اداکارہ بشریٰ انصاری نے ایک بار پھر سوشل میڈیا پر اپنے نام سے بنائے گئے جعلی اکاؤنٹس کی سنگینی کو اجاگر کرتے ہوئے عوام کو سخت خبردار کیا ہے کہ ایسے فراڈ اکاؤنٹس پر یقین نہ کریں اور نہ ہی انہیں فالو کریں۔
اداکارہ نے انسٹاگرام پر ایک ویڈیو پیغام جاری کیا جس میں انہوں نے بتایا کہ کچھ شرارتی عناصر ان کی تصاویر اور نام کا غلط استعمال کر کے لوگوں سے پیسے اینٹھنے کی کوشش کر رہے ہیں۔
ویڈیو کے کیپشن میں انہوں نے لکھا: “اب سوشل میڈیا پر بھکاری بھی آ گئے ہیں جو میری جعلی آئی ڈیز بنا کر لوگوں کو دھوکا دے رہے ہیں، براہِ کرم انہیں فالو نہ کریں۔
“بشریٰ انصاری کے مطابق، یہ جعلی اکاؤنٹس جذباتی ہتھکنڈے استعمال کرتے ہیں، جیسے جمعرات کو خیرات کی اپیل، غریبوں، بیواؤں یا مستحقین کی مدد کے نام پر عطیات مانگنا، اور بعض تو دعویٰ کرتے ہیں کہ وہ ان کی سرپرستی میں کوئی فلاحی این جی او چلا رہے ہیں۔
شدید برہمی کا اظہار کرتے ہوئے اداکارہ نے کہا کہ انہوں نے زندگی میں کبھی کسی سے مدد یا چندہ کے نام پر پیسے نہیں مانگے۔ “اگر میں کسی کی مدد کرنا چاہوں تو خاموشی سے خود کرتی ہوں، نہ کبھی چندہ اکٹھا کیا اور نہ ہی کسی سے درخواست کی۔
“انہوں نے معاشرے میں موجود ایسے بے حس لوگوں پر افسوس کا اظہار کیا جو معروف شخصیات کی ساکھ اور نیک نامی کو ذاتی فائدے کے لیے استعمال کرتے ہیں اور سادہ لوح افراد کو لوٹنے سے نہیں ہچکچاتے۔
اداکارہ نے اسے شرمناک حرکت قرار دیا۔بشریٰ انصاری نے اپنے فینز کو مشورہ دیا کہ وہ صرف ان کے تصدیق شدہ اصل اکاؤنٹس کو ہی فالو کریں، تمام جعلی اکاؤنٹس کو پلیٹ فارم پر رپورٹ کر دیا گیا ہے، اور کسی مشکوک پیغام، مالی اپیل یا لنک پر ردعمل نہ دیں۔
اداکارہ کی یہ اپیل سوشل میڈیا صارفین کے لیے ایک اہم درس ہے کہ آن لائن فراڈ سے محتاط رہیں اور مشہور شخصیات کے نام پر ہونے والے دھوکوں سے بچیں۔
