UrduLead UrduLead
Related Articles
وزیراعظم محمد شہباز شریف اور سعودی عرب کے ولی عہد شہزادہ محمد بن سلمان بن عبدالعزیز آل سعود کے درمیان ٹیلی فونک گفتگو ہوئی جو نہایت گرمجوش اور خوشگوار ماحول میں ہوئی۔
وزیراعظم شہباز شریف نے خادم الحرمین الشریفین شاہ سلمان بن عبدالعزیز آل سعود اور ولی عہد شہزادہ محمد بن سلمان کے لیے نیک تمناؤں اور احترام کا اظہار کیا۔
انہوں نے پاکستان کے لیے سعودی ولی عہد کی محبت، خلوص اور گرمجوشی پر شکریہ ادا کیا۔
دونوں رہنماؤں نے حالیہ مہینوں میں نئی بلندیوں کو چھونے والے دیرینہ برادرانہ تعلقات کو مزید مضبوط کرنے کا اعادہ کیا۔ گفتگو کے دوران علاقائی صورتحال اور موجودہ پیش رفت پر بھی تبادلہ خیال ہوا۔
وزیراعظم نے موجودہ چیلنجز کے تناظر میں امت مسلمہ کے درمیان اتحاد اور ہم آہنگی کی ضرورت پر زور دیا۔ سعودی عرب کے ساتھ پاکستان کی مکمل یکجہتی کا اظہار کرتے ہوئے انہوں نے کہا کہ بات چیت اور سفارت کاری کے ذریعے علاقائی امن و استحکام کو برقرار رکھنا ناگزیر ہے۔
سعودی ولی عہد شہزادہ محمد بن سلمان نے ٹیلی فونک رابطے پر وزیراعظم کا شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون کو مزید فروغ دینے کی خواہش کا اعادہ کیا۔
انہوں نے آئندہ سال پاکستان کا سرکاری دورہ کرنے کی بھی خواہش ظاہر کی۔یہ ٹیلی فونک گفتگو دونوں ممالک کے درمیان تاریخی اور گہرے برادرانہ تعلقات کی مزید ایک عکاسی ہے جو حالیہ برسوں میں مختلف شعبوں میں تیزی سے مضبوط ہو رہے ہیں۔
