UrduLead UrduLead
Related Articles
ملک کے شمالی اور پہاڑی علاقوں میں برفباری اور بارشوں کے باعث شدید سردی کی لہر جاری ہے۔
آج رات اور یکم جنوری کے دوران ناران، کاغان، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، اسکردو، مری، گلیات، وادی نیلم، باغ، پونچھ اور حویلی میں سڑکیں بند ہونے اور پھسلن کی وجہ سے ٹریفک کی روانی متاثر ہونے کا خدشہ ہے۔
بالائی خیبر پختونخوا، کشمیر اور گلگت بلتستان کے پہاڑی علاقوں میں لینڈ سلائیڈنگ اور برفانی تودوں کے گرنے کا خطرہ برقرار ہے۔ اس دوران پنجاب کے وسطی اور جنوبی علاقوں تہہ بالائی سندھ میں دھند کی شدت میں کمی کا امکان ہے۔
محکمہ موسمیات کے مطابق بدھ (یکم جنوری) کو بالائی اور وسطی پنجاب، خیبر پختونخوا، شمالی بلوچستان، گلگت بلتستان، کشمیر اور اسلام آباد میں گرج چمک کے ساتھ بارش جبکہ پہاڑوں پر برفباری متوقع ہے۔
ملک کے دیگر علاقوں میں موسم سرد رہے گا۔جمعرات کو ملک کے بیشتر حصوں میں موسم سرد اور خشک رہنے کا امکان ہے، تاہم بالائی خیبر پختونخوا، گلگت بلتستان، کشمیر، خطہ پوٹھوہار، شمال مشرقی پنجاب اور اسلام آباد میں چند مقامات پر تیز ہواؤں اور گرج چمک کے ساتھ مزید بارش اور پہاڑوں پر برفباری ہو سکتی ہے۔
گذشتہ 24 گھنٹوں کا موسم:
سندھ، بلوچستان، خیبر پختونخوا، گلگت بلتستان اور بالائی/جنوبی پنجاب میں کہیں کہیں گرج چمک کے ساتھ بارش اور پہاڑوں پر برفباری ریکارڈ کی گئی۔
سب سے زیادہ بارش چھور میں 34 ملی میٹر، روہڑی 32، سکھر 24 اور کوئٹہ (سمنگلی) میں 25 ملی میٹر نوٹ کی گئی۔ برفباری کالام میں 4 انچ، مسلم باغ 3 انچ اور مالم جبہ میں 1 انچ ریکارڈ ہوئی۔
آج ریکارڈ کیا جانے والا سب سے کم درجہ حرارت لہہ میں منفی 6، گوپس منفی 2 اور پاڑہ چنار میں منفی 1 ڈگری سینٹی گریڈ رہا۔
محکمہ موسمیات نے شہریوں کو احتیاط برتنے اور سفر کے دوران موسم کی تازہ صورتحال چیک کرنے کی ہدایت کی ہے۔
