UrduLead UrduLead
Related Articles
وزارت خزانہ نے ماہانہ اکنامک اپ ڈیٹ اینڈ آؤٹ لک رپورٹ جاری کر دی ہے جس میں ملک کی معاشی صورتحال کو مثبت قرار دیا گیا ہے۔
رپورٹ کے مطابق پہلی سہ ماہی میں جی ڈی پی گروتھ 3.71 فیصد ریکارڈ کی گئی ہے اور آئندہ مہینوں میں یہ رفتار برقرار رہنے کا امکان ہے۔
رپورٹ میں بتایا گیا کہ سیلاب اور سخت مالیاتی پالیسیوں کے باوجود معاشی شرح نمو میں اضافہ ہوا ہے۔ صنعتی سیکٹر سے معیشت کا مستقبل روشن نظر آ رہا ہے جہاں ٹیکسٹائل، آٹو موبائل، سیمنٹ اور فوڈ پروسیسنگ کی صنعتوں میں نمایاں بہتری آئی ہے۔
لارج اسکیل مینوفیکچرنگ میں جولائی تا اکتوبر 5.02 فیصد اضافہ ریکارڈ کیا گیا جبکہ کاروں کی پیداوار 65 فیصد بڑھ گئی۔ زراعت میں 2.89 فیصد، صنعت میں 9.38 فیصد اور خدمات کے شعبے میں 2.35 فیصد ترقی نوٹ کی گئی۔
ترسیلات زر میں 9.3 فیصد اضافے سے 16.14 ارب ڈالر تک پہنچ گئیں جو معیشت کو مضبوط سہارا فراہم کر رہی ہیں۔ آئی ٹی برآمدات 18.5 فیصد بڑھ کر 1.8 ارب ڈالر ہو گئیں۔ زرمبادلہ ذخائر مارچ 2022 کے بعد بلند ترین سطح پر پہنچ گئے اور آئی ایم ایف جائزے کے بعد پاکستان کو 1.2 ارب ڈالر موصول ہوئے۔
موجودہ مالی سال میں کرنٹ اکاؤنٹ خسارہ ہدف میں رہنے کا امکان ہے اور پہلے پانچ ماہ میں یہ کم ہو کر 812 ملین ڈالر رہ گیا، جبکہ نومبر میں 100 ملین ڈالر سرپلس ریکارڈ ہوا۔تاہم کچھ شعبوں میں چیلنجز بھی موجود ہیں۔
جولائی تا نومبر سرمایہ کاری 25.3 فیصد کمی سے 930 ملین ڈالر تک محدود رہی، برآمدات 3.2 فیصد کم ہو کر 12.8 ارب ڈالر رہیں جبکہ درآمدات 11.1 فیصد اضافے سے 25.6 ارب ڈالر ہو گئیں۔ نومبر 2025 میں مہنگائی کی شرح 6.1 فیصد ریکارڈ کی گئی جو گزشتہ سال کے 4.9 فیصد سے زیادہ ہے۔
رپورٹ میں ٹیکس وصولی میں 10.2 فیصد اضافے سے 4,733 ارب روپے اکٹھے ہونے، حکومتی اخراجات پر کنٹرول، بہتر گورننس اور ڈیجیٹل اصلاحات کو معاشی استحکام کا کریڈٹ دیا گیا۔ جولائی تا اکتوبر مجموعی مالیاتی سرپلس جی ڈی پی کا 1 فیصد رہا۔
اسٹاک مارکیٹ میں بھی بہتری آئی جہاں نومبر میں 100 انڈیکس 5,046 پوائنٹس بڑھا اور مارکیٹ کیپیٹلائزیشن 18,866 ارب روپے تک پہنچ گئی۔ دسمبر 2025 میں پالیسی ریٹ 50 بیسس پوائنٹس کم ہو کر 10.5 فیصد ہو گیا۔زرعی سیکٹر کے لیے ربیع 2025-26 کا گندم کا ہدف 29.68 ملین ٹن مقرر کیا گیا ہے جبکہ زرعی قرضوں کی فراہمی میں 18.6 فیصد اضافہ ہوا۔
وزیر منصوبہ بندی احسن اقبال نے واٹر سیکیورٹی کو پاکستان کی معاشی اور موسمیاتی بقا سے جوڑتے ہوئے کہا کہ مالیاتی نظم و ضبط سے استحکام مضبوط ہوا ہے۔
رپورٹ کے مطابق معیشت کا حجم اور فی کس آمدن میں اضافہ ہوا ہے اور بیرون ملک پاکستانیوں کی ترسیلات زر معیشت کی مضبوطی کا باعث بنیں گی۔ وزارت خزانہ کا کہنا ہے کہ صنعتی ترقی، بہتر پالیسیاں اور اصلاحات سے معاشی رفتار مثبت رہے گی۔
