UrduLead UrduLead
Related Articles
وفاقی حکومت نے سونے کی درآمد اور برآمد پر عائد پابندی ختم کرتے ہوئے باضابطہ نوٹیفکیشن جاری کر دیا ہے۔ پابندی کے خاتمے کا فیصلہ وفاقی کابینہ کی منظوری کے بعد سامنے آیا، جس کے بعد وزارتِ تجارت نے متعلقہ آرڈر جاری کیا۔
نوٹیفکیشن میں کہا گیا ہے کہ سونے کی عالمی تجارت سے متعلق معطل شدہ ایس آر او دوبارہ بحال کر دیا گیا ہے۔ حکومت نے قیمتی دھاتوں اور زیورات کی درآمد و برآمد سے متعلق چند ترامیم بھی متعارف کرائی ہیں، تاہم موجودہ فریم ورک کو برقرار رکھا جائے گا۔ حکام کے مطابق اس فریم ورک کو مزید شفاف اور خودکار بنانے کے اقدامات جاری رہیں گے تاکہ غیر قانونی تجارت کی روک تھام یقینی بنائی جا سکے۔
یاد رہے کہ رواں سال مئی میں سونے کی ایکسپورٹ اور امپورٹ پر پابندی عائد کی گئی تھی۔ وزارتِ تجارت نے 6 مئی 2025ء کو سونے کی تجارت کو منظم کرنے والا ایس آر او ساٹھ روز کے لیے معطل کیا تھا، جس کے بعد ملک میں قیمتی دھات کی قانونی تجارت جزوی طور پر رک گئی تھی۔
ذرائع کا کہنا ہے کہ پابندی سونے کی اسمگلنگ کی بڑھتی ہوئی شکایات کے باعث لگائی گئی تھی۔ تاہم حالیہ مہینوں میں اسمگلنگ سے متعلق کوئی نئی شکایت سامنے نہیں آئی، جس کے بعد حکومت نے پابندی ختم کرنے کا فیصلہ کیا۔ تجارتی ماہرین کا کہنا ہے کہ یہ فیصلہ مارکیٹ میں استحکام اور زیورات سازی کی صنعت کے لیے مثبت اثرات لا سکتا ہے، جبکہ قانونی درآمد اور برآمد کا نظام بہتر نگرانی کے تحت بحال ہو جائے گا۔
