UrduLead UrduLead
Related Articles
معروف پاکستانی اداکار فیروز خان نے اپنی ذاتی زندگی سے جڑی مسلسل تنقید، سوشل میڈیا دباؤ اور مشکل ترین حالات پر کھل کر گفتگو کرتے ہوئے بتایا ہے کہ وہ ایک وقت میں شدید ذہنی اور جذباتی تناؤ کا شکار ہو گئے تھے۔ اداکار نے یہ بات گرین انٹرٹینمنٹ کے پروگرام گرین روم سے گفتگو کے دوران کہی، جس کا نیا ٹیزر حال ہی میں جاری کیا گیا ہے۔
فیروز خان، جو ڈرامہ سیریل خانی کی کامیابی کے بعد شہرت کی بلندیوں پر پہنچے، نے کہا کہ انہیں ان کی ذاتی زندگی کی وجہ سے مسلسل نشانہ بنایا جاتا رہا۔ ان کا کہنا تھا کہ اس دباؤ نے ایک وقت میں ان کی صحت اور ذہنی حالت پر گہرا اثر ڈالا۔ انہوں نے اعتراف کیا کہ وہ نفسیاتی دباؤ کے باعث ایسے لمحوں سے بھی گزرے جہاں انہیں اپنی جان کو خطرہ محسوس ہوا۔
ٹیزر میں فیروز خاننے بتایا کہ ایک روز وہ شدید دباؤ کے باعث بے ہوش ہو گئے تھے اور انہیں محسوس ہوا کہ وہ موت کے قریب پہنچ گئے ہیں۔ انہوں نے کہا کہ اپنے بچوں سے دوری نے انہیں شدید تکلیف میں مبتلا رکھا، جو ان کے مطابق سب سے بڑی اذیت تھی۔ فروز خان نے کہا کہ انہوں نے ایک وقت میں اداکاری چھوڑ کر کوئی چھوٹا کاروبار کرنے کا بھی سوچا تھا۔
اداکار نے مزید کہا کہ وہ اس دوران عدالتی مقدمات اور الزامات کا سامنا بھی کر رہے تھے، جس نے حالات کو مزید پیچیدہ بنا دیا۔ تاہم انہوں نے بتایا کہ ان کی والدہ کی دعاؤں نے انہیں دوبارہ سنبھلنے میں اہم کردار ادا کیا۔ فروز خان کے مطابق ان کی والدہ نے آیت الکرسی پڑھ کر ان پر دم کیا، جس کے بعد انہیں ہوش آیا اور ان کی حالت بہتر ہونا شروع ہوئی۔
گرین انٹرٹینمنٹ کے مطابق مکمل انٹرویو جلد نشر کیا جائے گا، جس میں فروز خان اپنی زندگی کے مشکل ترین دور اور دوبارہ مضبوطی سے کھڑے ہونے کے سفر پر تفصیل سے بات کرتے نظر آئیں گے۔
