UrduLead UrduLead
Related Articles
انٹرنیشنل کرکٹ کونسل (آئی سی سی) کے ٹی ٹوئنٹی ورلڈ کپ 2026 کے گروپس اور پاک بھارت مقابلے کی ابتدائی تفصیلات سامنے آ گئی ہیں، جبکہ ایونٹ کا باضابطہ شیڈول 25 نومبر کو جاری کیا جائے گا۔
میڈیا رپورٹس کے مطابق اس بار ورلڈ کپ میں 20 ٹیمیں حصہ لیں گی جنہیں چار گروپس میں تقسیم کیا جائے گا، ہر گروپ میں پانچ ٹیمیں شامل ہوں گی۔ ہر گروپ کی ٹاپ دو ٹیمیں سپر 8 مرحلے کے لیے کوالیفائی کریں گی۔
پاکستان اور بھارت کی روایتی حریف ٹیموں کو ایک ہی گروپ میں رکھا گیا ہے۔ دونوں کے درمیان اہم میچ 15 فروری کو کولمبو میں ہوگا۔ گروپ میں پاکستان اور بھارت کے ساتھ نیدرلینڈز، نمیبیا اور یو ایس اے کی ٹیمیں شامل ہونے کا امکان ہے۔ کرکٹ ماہرین کا کہنا ہے کہ پاک بھارت میچ ہمیشہ کی طرح عالمی توجہ کا مرکز رہے گا کیونکہ دونوں ممالک کے درمیان دوطرفہ سیریز نہ ہونے کے باعث ورلڈ کپ مقابلے ہی شائقین کی واحد بڑی توقع ہوتے ہیں۔
مشترکہ میزبان سری لنکا کے گروپ میں آسٹریلیا، زمبابوے، آئرلینڈ اور عمان کی ٹیمیں شامل ہوں گی۔ انگلینڈ، ویسٹ انڈیز، بنگلادیش، نیپال اور اٹلی کے ایک گروپ میں آنے کا امکان ہے جبکہ جنوبی افریقہ، نیوزی لینڈ، افغانستان، یو اے ای اور کینیڈا کو ایک گروپ میں رکھا جا سکتا ہے۔
ٹی ٹوئنٹی ورلڈ کپ 7 فروری سے 8 مارچ تک جاری رہے گا۔ بھارت میں میچز ممبئی، کولکتہ، چنائی، دہلی اور احمد آباد میں ہوں گے جبکہ سری لنکا میں مقابلے کولمبو اور کینڈی میں شیڈول کیے جا رہے ہیں۔ پاکستان اپنی تمام گروپ میچز سری لنکا میں کھیلے گا۔
آئی سی سی نے فائنل کے لیے بھارتی شہر احمد آباد کا انتخاب کیا ہے، تاہم پاکستان فائنل میں پہنچنے کی صورت میں فیصلہ کن میچ کولمبو میں منتقل کر دیا جائے گا۔ سیمی فائنلز ممبئی اور کولکتہ میں ہوں گے، تاہم وینیوز کا انحصار سیمی فائنلسٹ ٹیموں پر ہوگا۔ اگر پاکستان سیمی فائنل میں پہنچا تو اس کا میچ بھی سری لنکا میں ہی ہوگا۔
شائقین کرکٹ اس بڑے ایونٹ اور روایتی حریفوں کے درمیان ہائی وولٹیج مقابلے کے انتظار میں ہیں، جبکہ آفیشل شیڈول کے اعلان کے بعد تمام ٹیموں کی تیاریاں آخری مرحلے میں داخل ہو جائیں گی۔
