پاکستان نے سری لنکا کو دوسرے ون ڈے میں 8 وکٹ سے ہرا کر سیریز اپنے نام کرلی

Related Articles

پیٹرولیم مصنوعات کی قیمتوں میں کمی کا اعلان

2 گھنٹے ago

فواد خان اور ماہرہ خان کی فلم ’نیلوفر‘ ریلیز، سنیما گھروں میں رونق بحال

3 دن ago

ملک میں ہفتہ وار مہنگائی 0.73 فیصد اضافے کے ساتھ بڑھ گئی

3 دن ago

پاکستان نے سری لنکا کو دوسرے ایک روزہ میچ میں شاندار کارکردگی کا مظاہرہ کرتے ہوئے 8 وکٹ سے شکست دے کر تین میچوں کی سیریز میں 0-2 کی فیصلہ کن برتری حاصل کرلی۔

راولپنڈی کرکٹ اسٹیڈیم میں کھیلے گئے میچ میں سری لنکا نے پاکستان کو جیت کے لیے 289 رنز کا ہدف دیا تھا، جسے گرین شرٹس نے 49 اوورز میں صرف 2 وکٹوں کے نقصان پر باآسانی حاصل کرلیا۔

بابر اعظم کی شاہکار سنچری، سعید انور کا ریکارڈ برابر

پاکستان کی فتح میں سب سے اہم کردار بابر اعظم کی ناقابلِ شکست سنچری رہی۔ انہوں نے شاندار انداز میں بیٹنگ کرتے ہوئے سعید انور کے ایک اور ریکارڈ کی برابری بھی کرلی۔ محمد رضوان 51 رنز کے ساتھ ناٹ آؤٹ رہے جبکہ فخر زمان 78 اور صائم ایوب 33 رنز بناکر آؤٹ ہوئے۔ سری لنکا کی جانب سے دونوں وکٹیں دشمانتا چمیرا نے حاصل کیں۔

سری لنکن بیٹرز کی ناکام کوشش

اس سے قبل سری لنکا نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر 288 رنز بنائے۔ لنتھ لیاناگے 54 رنز کے ساتھ نمایاں رہے۔ کمنڈو مینڈس نے 44، سدیرا سمارا وکرما نے 42 اور ہسارنگا نے 37 رنز کی اننگز کھیلی۔
پاکستان کی جانب سے ابرار احمد اور حارث رؤف نے 3، 3 جبکہ محمد وسیم نے ایک وکٹ حاصل کی۔

ٹیم میں بڑی تبدیلیاں، قیادت سلمان علی آغا کے سپرد

پاکستان نے ٹاس جیت کر پہلے فیلڈنگ کا فیصلہ کیا اور اسکواڈ میں دو تبدیلیاں کیں۔ کپتان شاہین شاہ آفریدی بیماری کے باعث میچ نہ کھیل سکے، جس کے باعث قیادت سلمان علی آغا نے سنبھالی۔ فہیم اشرف کی جگہ وسیم جونیئر جبکہ شاہین کی جگہ ابرار احمد کو شامل کیا گیا۔

اسٹیڈیم کے اطراف سخت سیکیورٹی

پولیس حکام کے مطابق راولپنڈی کرکٹ اسٹیڈیم کے گرد و نواح میں سیکیورٹی کے انتہائی سخت انتظامات کیے گئے تھے۔ ٹیموں کی آمد و روانگی کے وقت بھی بھاری نفری تعینات رہی۔

حالیہ دہشت گردی کے واقعات کے بعد اسٹیڈیم کے اطراف عمارتوں پر سنائپرز تعینات کیے گئے جبکہ وی آئی پی پارکنگ میں صرف اسٹیکرز والی گاڑیوں کو داخلے کی اجازت دی گئی۔

شائقین کو شناختی دستاویزات ساتھ رکھنے کی ہدایت کی گئی تھی اور پولیس افسران کو مشکوک افراد اور سرگرمیوں پر کڑی نظر رکھنے کا حکم دیا گیا۔

سری لنکن کھلاڑیوں کی محسن نقوی سے ملاقات

میچ سے قبل سری لنکن کرکٹرز نے چیئرمین پی سی بی محسن نقوی سے ملاقات بھی کی جس میں سیکیورٹی اور سیریز کے انتظامات پر بات چیت ہوئی۔

سیریز کا تیسرا اور آخری میچ 16 نومبر کو کھیلا جائے گا۔