UrduLead UrduLead
Related Articles
کیمبرج انٹرنیشنل ایجوکیشن کو ایک بار پھر امتحانی شفافیت کے بحران کا سامنا ہے، جہاں اے لیول بزنس اسٹڈیز کا پرچہ امتحان سے گھنٹوں قبل لیک ہونے کی اطلاعات سامنے آئی ہیں، جس نے طلبہ اور تعلیمی حلقوں میں شدید تشویش پیدا کر دی ہے۔
رپورٹس کے مطابق 5 مئی کو بزنس اسٹڈیز کے پرچے (کوڈ 9609) کی تصاویر سوشل میڈیا اور میسجنگ پلیٹ فارمز پر امتحان سے تقریباً 12 گھنٹے قبل گردش کرنے لگیں۔ طلبہ اور اساتذہ نے فوری طور پر اس معاملے کو اجاگر کرتے ہوئے کیمبرج اور برٹش کونسل سے تحقیقات کا مطالبہ کیا۔
Please help us report this to Cambridge and British Council. It's the second paper leaked after Maths. At this point, I don't think students should even study for the next paper!https://t.co/NsUZAJd269
— Asjad Khanzada (@AsjadKhanzada20) May 5, 2026
یہ پیش رفت ایسے وقت میں سامنے آئی ہے جب چند روز قبل ہی کیمبرج نے اے ایس میتھمیٹکس پیپر 12 (9709) کے لیک ہونے کی تصدیق کی تھی اور کہا تھا کہ وہ معاملے کی تحقیقات کر رہا ہے۔ ادارے نے اس بات پر زور دیا تھا کہ بدعنوانی میں ملوث افراد کے خلاف سخت کارروائی کی جائے گی۔
تاہم بزنس اسٹڈیز کے پرچے کے حوالے سے تاحال کوئی باضابطہ تصدیق سامنے نہیں آئی، لیکن مسلسل لیکس کے باعث امتحانی نظام کی سکیورٹی پر سوالات مزید گہرے ہو گئے ہیں۔ سوشل میڈیا پلیٹ فارم ایکس (ٹوئٹر) پر صارفین نے اسے موجودہ امتحانی سیشن کا دوسرا بڑا لیک قرار دیا ہے۔
طلبہ نے شدید ردعمل دیتے ہوئے کہا ہے کہ اس طرح کے واقعات ان کی مہینوں کی محنت کو متاثر کرتے ہیں اور کچھ امیدواروں کو ناجائز فائدہ ملتا ہے۔ کئی طلبہ اور والدین نے فیس کی واپسی، فوری طور پر مفت ری ٹیک اور امتحانی نظام میں سخت سکیورٹی اقدامات کا مطالبہ کیا ہے۔
یہ مسئلہ نیا نہیں ہے۔ گزشتہ برس 2025 میں بھی میتھمیٹکس اور کمپیوٹر سائنس کے پرچوں کے جزوی لیک ہونے کے واقعات رپورٹ ہوئے تھے، جس کے بعد تحقیقات اور بعض کیسز میں دوبارہ امتحانات کا انعقاد کیا گیا تھا۔ ناقدین کا کہنا ہے کہ بار بار ایسے واقعات امتحانی نظام میں بنیادی کمزوریوں کی نشاندہی کرتے ہیں، خصوصاً پاکستان جیسے بڑے امتحانی مراکز میں۔
پاکستان میں کیمبرج امتحانات کے انتظامات سنبھالنے والی برٹش کونسل بھی تنقید کی زد میں ہے، جہاں سکیورٹی اور نگرانی کے نظام کو مزید مضبوط بنانے کی ضرورت پر زور دیا جا رہا ہے۔
صورتحال نے ہزاروں طلبہ اور والدین میں بے چینی پیدا کر دی ہے، جبکہ سب کی نظریں کیمبرج انٹرنیشنل ایجوکیشن کے باضابطہ ردعمل اور ممکنہ اقدامات پر مرکوز ہیں۔
