UrduLead UrduLead
Related Articles
کراچی ایم اے جناح روڈ پر واقع گل پلازہ شاپنگ مال میں ہفتہ کی رات لگنے والی شدید آتشزدگی کے نتیجے میں ہولناک سانحہ میں ریسکیو حکام نے اب تک 26 اموات کی تصدیق کر دی ہے، جبکہ لاپتہ افراد کی تعداد میں مزید 10 کا اضافہ ہو کر 81 ہو گئی ہے۔
ڈپٹی کمشنر ساؤتھ جاوید نبی کھوسو نے جیو نیوز سے گفتگو کرتے ہوئے بتایا کہ رات کے وقت مزید 2 لاشیں برآمد ہوئی ہیں۔ گل پلازہ کے گراؤنڈ فلور اور پہلی منزل کو کلیئر کر دیا گیا ہے۔ انہوں نے کہا کہ لاپتہ افراد کی فہرست میں کچھ نام دو بار شامل ہیں، اس لیے فی الحال 74 افراد کی لاپتہ ہونے کی تصدیق ہوئی ہے۔
متاثرین کے ریسکیو آپریشن کو تیز کرنے کا مطالبہ بھی کیا جا رہا ہے۔پولیس سرجن ڈاکٹر سمیعہ طارق کے مطابق سول اسپتال میں اب تک 20 لاشوں کے ڈی این اے سیمپل لیے جا چکے ہیں، جبکہ 48 خاندانوں نے اپنے ڈی این اے سیمپل جمع کروا دیے ہیں۔
ڈی آئی جی ساؤتھ اسد رضا نے بتایا کہ سندھ فرانزک ڈی این اے لیبارٹری، جامعہ کراچی میں اگلے تین دنوں تک کراس میچنگ کا عمل جاری رہے گا تاکہ باقی لاشوں کی شناخت ممکن ہو سکے۔
ریسکیو حکام کا کہنا ہے کہ 18 لاشوں کی شناخت ہو چکی ہے، جبکہ لاپتہ افراد میں سے 8 لاشیں ایسی ہو سکتی ہیں جن کی ابھی تک شناخت نہیں ہوئی۔ عمارت کا کچھ حصہ منہدم ہو چکا ہے اور ملبہ ہٹانے کا کام جاری ہے۔
دوسری جانب گل پلازہ آتشزدگی سے متعلق تحقیقاتی کمیٹی کا اجلاس آج طلب کر لیا گیا ہے، جس میں آگ لگنے کی وجوہات، حفاظتی انتظامات کی کمی اور دیگر پہلوؤں کا جائزہ لیا جائے گا۔
یہ سانحہ کراچی کے شہریوں کے لیے ایک بڑا صدمہ ہے، جہاں خاندان اپنے پیاروں کی تلاش میں پریشان ہیں اور ریسکیو ٹیمیں مسلسل کام کر رہی ہیں۔
