UrduLead UrduLead
Related Articles
پاکستان سپر لیگ کے گیارھویں ایڈیشن کے لیے غیر ملکی کھلاڑیوں کی رجسٹریشن کا باضابطہ آغاز ہوگیا ہے، جس کی آخری تاریخ 20 جنوری 2026 مقرر کی گئی ہے۔
پاکستان کرکٹ بورڈ کے مطابق ایچ بی ایل پی ایس ایل 11 کا انعقاد 26 مارچ سے 3 مئی 2026 تک کیا جائے گا۔
پی سی بی کا کہنا ہے کہ نئے سیزن کا شیڈول جاری کردیا گیا ہے، جس کے تحت ٹورنامنٹ میں مجموعی طور پر 44 میچز کھیلے جائیں گے۔ لیگ میں شامل ہر ٹیم کو کم از کم 10 میچز کھیلنے کا موقع ملے گا، جس سے مقابلوں میں تسلسل اور مسابقت میں اضافہ متوقع ہے۔
پی ایس ایل 11 میں پہلی بار دو نئی ٹیموں کا اضافہ کیا جارہا ہے۔ ان نئی فرنچائزز کی نیلامی 8 جنوری کو اسلام آباد میں ہوگی، جسے براہِ راست نشر کیا جائے گا۔ دو نئی ٹیموں کے شامل ہونے کے بعد لیگ میں مجموعی ٹیموں کی تعداد 8 ہو جائے گی۔
پی سی بی کے مطابق نئی فرنچائزز کے اضافے سے نہ صرف ٹورنامنٹ کا دائرہ وسیع ہوگا بلکہ مقامی اور غیر ملکی کھلاڑیوں کے لیے مزید مواقع بھی پیدا ہوں گے۔ میچز کی تعداد بڑھنے سے نوجوان کرکٹرز کو اعلیٰ سطح پر اپنی صلاحیتیں دکھانے کا زیادہ موقع ملے گا۔
پاکستان سپر لیگ گزشتہ برسوں میں دنیا کی مقبول ترین ٹی ٹوئنٹی لیگز میں شامل ہوچکی ہے، جہاں بین الاقوامی کھلاڑیوں کی شرکت نے اس کی عالمی ساکھ کو مزید مضبوط کیا ہے۔ پی ایس ایل 11 میں بھی غیر ملکی کھلاڑیوں کی بڑی تعداد کی شرکت متوقع ہے، جس سے شائقین کو اعلیٰ معیار کی کرکٹ دیکھنے کو ملے گی۔
