UrduLead UrduLead
Related Articles
قومی ٹیم نے سیریز 1-1 سے برابر کردی، بابر نے روہت شرما کا عالمی ریکارڈ توڑ دیا
قذافی اسٹیڈیم لاہور میں کھیلے گئے دوسرے ٹی20 میچ میں پاکستان نے جنوبی افریقہ کو 9 وکٹوں سے شکست دے کر سیریز 1-1 سے برابر کردی، جبکہ قومی ٹیم کے سابق کپتان بابر اعظم نے اس میچ کے دوران ٹی20 کرکٹ میں سب سے زیادہ رنز بنانے والے بیٹر بننے کا اعزاز حاصل کیا، بھارت کے روہت شرما کا ریکارڈ توڑتے ہوئے۔
جنوبی افریقہ کی جانب سے دیا گیا 111 رنز کا ہدف پاکستان نے 14ویں اوور کی پہلی گیند پر باآسانی حاصل کیا۔ نوجوان اوپنر صائم ایوب نے شاندار فارم میں واپسی کرتے ہوئے 38 گیندوں پر ناقابلِ شکست 71 رنز بنائے، جن میں 6 چوکے اور 5 چھکے شامل تھے۔ بولنگ میں فہیم اشرف نے 4 وکٹیں حاصل کیں، جبکہ سلمان مرزا نے 4 اوورز میں صرف 14 رنز دے کر 3 کھلاڑیوں کو آؤٹ کیا اور میچ کے بہترین کھلاڑی قرار پائے۔
بابر اعظم نے 18 گیندوں پر ایک چوکے کی مدد سے 11 رنز بنائے، تاہم اس دوران انہوں نے ٹی20 کرکٹ میں سب سے زیادہ 4 ہزار 234 رنز مکمل کرتے ہوئے بھارت کے سابق کپتان روہت شرما کا عالمی ریکارڈ توڑ دیا۔ بابر نے یہ سنگ میل 130 میچز اور 123 اننگز میں 39.57 کی اوسط اور 128.77 کے اسٹرائیک ریٹ سے حاصل کیا۔ ان کے کریئر میں 3 سنچریاں اور 36 نصف سنچریاں شامل ہیں۔
روہت شرما نے 159 میچوں کی 151 اننگز میں 4 ہزار 231 رنز بنائے تھے، اوسط 32.05 رہی، اور وہ 5 سنچریوں کے مشترکہ ریکارڈ کے بھی حامل ہیں۔ بھارت کے ویرات کوہلی اس فہرست میں تیسرے نمبر پر ہیں، جنہوں نے 117 اننگز میں 4 ہزار 188 رنز 48.69 کی شاندار اوسط سے بنائے۔
چوتھے نمبر پر انگلینڈ کے تجربہ کار بلے باز جوز بٹلر ہیں، جنہوں نے 132 اننگز میں 3 ہزار 869 رنز 35.49 کی اوسط اور 148.97 کے اسٹرائیک ریٹ سے بنائے، جبکہ آئرلینڈ کے پال اسٹرلنگ 3 ہزار 710 رنز کے ساتھ پانچویں اور نیوزی لینڈ کے مارٹن گپٹل 3 ہزار 531 رنز کے ساتھ چھٹے نمبر پر ہیں۔
پاکستان کے وکٹ کیپر بیٹر محمد رضوان نے 106 میچوں کی 93 اننگز میں 3 ہزار 414 رنز 47.41 کی اوسط اور 125.37 کے اسٹرائیک ریٹ سے بنائے ہیں اور وہ بھی دنیا کے صفِ اول کے ٹی20 بلے بازوں میں شمار ہوتے ہیں۔
کرکٹ ماہرین کے مطابق بابر اعظم کے عالمی ریکارڈ اور صائم ایوب جیسے نوجوان بلے بازوں کی شاندار فارم سے پاکستان کی ٹی20 ٹیم کو آئندہ آئی سی سی ٹی20 ورلڈ کپ 2026 سے قبل نیا اعتماد حاصل ہوگا۔ سیریز کا فیصلہ کن تیسرا میچ لاہور میں کھیلا جائے گا۔
