UrduLead UrduLead
Related Articles
بھارت کی جانب سے جدید اسرائیلی ڈرونز سے دراندازی کا سلسلہ دوسرے روز بھی شروع ہوگیا، پاک فوج نے صبح سے اب تک 6 ڈرون مار گرائے ہیں۔
بھارت کی جانب سے چھوڑے گئے 4 جدید اسرائیلی ہیروپ ڈرونز کو اوکاڑہ کینٹ کے علاقے میں آبادی سے کچھ فاصلے پر فصلوں میں گرایا گیا، کوئی جانی نقصان نہیں ہوا۔
سیکیورٹی ذرائع کا کہنا ہے کہ پاک فوج کی جانب سے ایک ڈرون کو وہاڑی، ایک کو پاکپتن اور 4 ڈرونز کو اوکاڑہ میں تباہ کیا گیا ہے، کل سے اب تک دشمن کے 35 ڈرونز کو تباہ کیا جا چکا ہے۔
پاک فوج کے شعبہ تعلقات عامہ (آئی ایس پی آر) کے ڈائریکٹرجنرل (ڈی جی) لیفٹیننٹ جنرل احمد شریف چوہدری کے مطابق مطابق تمام ڈرونز کو مسلسل ریڈار پر مانیٹر کیا جارہا تھا۔
ڈی جی آئی ایس پی آر کے مطابق جب بھی کوئی ڈرون آتا ہے تو وہ مسلسل ریڈار پر دیکھا جارہا ہوتا ہے، ہمارے ایئر ڈیفنس سسٹم میں اتنی صلاحیت ہے کہ وہ چھوٹے ڈرون کو بھی ٹریک کرلیتا ہے، شہری علاقوں اور کمرشل فلائٹس کی موجودگی میں ڈرون مار گرانے کا ایک آپریشنل طریقہ کار ہوتا ہے۔
دفاعی ماہرین کا کہنا ہے کہ پاکستان کا دفاعی نظام اور ایئر ڈیفنس سسٹم دشمن کے حملوں کو مسلسل ناکام بنا رہا ہے، ہیروپ ڈرون کی ٹریکنگ سے واضح ہے کہ پاکستان کا دفاعی اور ایئرڈیفنس سسٹم انتہائی مضبوط ہے۔
واضح رہے کہ بھارت نے جمعرات کے روز بھی پاکستان میں اسرائیلی ڈرونز سے دراندازی کی کوشش کی تھی، تاہم پاک فوج نے سوئفٹ اور ہارڈ ٹیکنالوجی کا استعمال کرتے ہوئے 29 ہیروپ ڈرون مار گرائے تھے۔
رپورٹس میں بتایا گیا تھا کراچی کے علاقے ملیر شرافی گوٹھ اور گلشن حدید میں 2 ڈرون گرائے گئے، سندھ کے ضلع گھوٹکی کے گاؤں سرفراز لغاری میں ڈرون تباہ ہونے کے بعد گرنے سے مختیار نامی کسان جاں بحق، جب کہ اس کا والد ایدھن زخمی ہوگیا تھا۔
پنجاب کے دارالحکومت لاہور میں 3 ڈرونز، راولپنڈی میں 3 ڈرونز، گوجرانوالہ میں 2 بھارتی ڈرونز ، شیخوپورہ کےگاؤں باہومان، چکوال کے تھانہ ڈوہمن کی حدود میں بھی ڈرون گرایا گیا تھا، بہاولپور کے قریب چولستان میں بھارتی ڈرون بھی گرایا گیا۔
اٹک میں بھی ایک ڈرون گرائے جانے کے دوران ملبہ گرنے سے محبوب نامی شہری جاں بحق ہوا، نارووال میں شہریوں نے بھارتی جاسوس ڈرون کر پکڑلیا، فورسز نے دیگر سرحدی مقامات پر بھی اسرائیلی ساختہ ڈرونز مار گرائے تھے۔
