UrduLead UrduLead
Related Articles
چیمپئنز ٹرافی 2025 کے سلسلے میں انٹرنیشنل کرکٹ کونسل (آئی سی سی) کے وفد نے نیشنل اسٹیڈیم کراچی کا دورہ کرتے ہوئے انتظامات اور سیکیورٹی امور کا جائزہ لیا۔
وفد میں سینئر منیجر ایونٹس سارا ایڈگر، جنرل منیجر وسیم خان، سیکیورٹی منیجر ڈیوڈ مسکر اور براڈ کاسٹ کنسلٹنٹ منصور منج شامل تھے۔
آئی سی سی کا وفد نیشنل اسٹیڈیم، قذافی اسٹیڈیم اور پنڈی اسٹیڈیم کا بھی دورہ کرے گا اور دورہ مکمل کرنے کے بعد اپنی رپورٹ مرتب کرے گا۔
یاد رہے کہ پاکستان چیمپئنز ٹرافی 2025 کی میزبانی کرے گا ، آئی سی سی پہلے ہی چیمپئنز ٹرافی کے بجٹ کی منظوری دے چکا ہے، پاکستان کرکٹ بورڈ (پی سی بی) ابتدائی شیڈول بھی آئی سی سی کو بھیج چکا ہے۔
پاکستان میں ہونے والی انٹرنیشنل کرکٹ کونسل (آئی سی سی) چیمپئنز ٹرافی 2025 کے لیے ڈرافٹ شیڈول منظر عام پر آچکا ہے،گروپ اے میں بھارت اور پاکستان کے علاوہ بنگلہ دیش اور نیوزی لینڈ شامل ہیں، جب کہ گروپ بی میں آسٹریلیا، انگلینڈ افغانستان اور جنوبی افریقہ شامل ہیں۔
ایونٹ کا آغاز میزبان پاکستان اور نیوزی لینڈ کے درمیان 19 فروری سے کراچی میں ہوگا، ٹورنامنٹ کے سیمی فائنلز 5 مارچ کو کراچی اور 6 مارچ کو راولپنڈی میں ہوں گے، جب کہ فائنل 9 مارچ کو لاہور میں ہوگا، اور 10 مارچ فائنل کے لیے ریزرو ڈے رکھا گیا ہے۔
