UrduLead UrduLead
Related Articles
کئی علاقوں میں بجلی کی بندش کا دورانیہ 14 گھنٹوں سے تجاوز
کراچی میں شدید گرمی کے باوجود اعلانیہ اور غیر اعلانیہ لوڈشیڈنگ کا سلسلہ جاری ہے جبکہ کئی علاقوں میں بجلی کی بندش کا دورانیہ 14 گھنٹوں سے تجاوز کر گیا ہے۔
شہر کے مختلف علاقوں میں طویل دورانیے کی لوڈشیڈنگ کے باعث شہریوں کو شدید مشکلات کا سامنا ہے۔ متاثرہ علاقوں میں گارڈن، لیاری، نارتھ کراچی، نیو کراچی، ملیر، کورنگی، اورنگی ٹاؤن، منگھو پیر، سرجانی ٹاؤن، سہراب گوٹھ اور بلدیہ ٹاؤن شامل ہیں جہاں کئی کئی گھنٹے بجلی بند رہنے کی شکایات سامنے آ رہی ہیں۔
شہریوں کا کہنا ہے کہ شدید گرمی اور حبس کے موسم میں بجلی کی طویل بندش نے معمولاتِ زندگی متاثر کر دیے ہیں۔ متعدد علاقوں میں پانی کی فراہمی بھی متاثر ہو رہی ہے جبکہ کاروباری سرگرمیوں اور گھریلو امور میں مشکلات بڑھ گئی ہیں۔
علاوہ ازیں ایسے علاقے بھی لوڈشیڈنگ سے محفوظ نہیں رہے جنہیں ماضی میں مستثنیٰ قرار دیا جاتا تھا۔ شہریوں نے غیر اعلانیہ لوڈشیڈنگ پر شدید برہمی کا اظہار کرتے ہوئے متعلقہ حکام سے فوری اقدامات کا مطالبہ کیا ہے۔
توانائی ماہرین کے مطابق گرمی کی شدت بڑھنے کے ساتھ بجلی کی طلب میں نمایاں اضافہ ہوا ہے جبکہ ترسیلی نظام پر دباؤ کے باعث بجلی کی فراہمی میں تعطل پیدا ہو رہا ہے۔ کراچی میں موسمِ گرما کے دوران بجلی کی قلت اور لوڈشیڈنگ کا مسئلہ ہر سال شدت اختیار کر جاتا ہے، جس پر صارفین اور کاروباری حلقے بارہا تحفظات کا اظہار کرتے رہے ہیں۔
