UrduLead UrduLead
Related Articles
پاکستان سپر لیگ (پی ایس ایل) کے گیارہویں ایڈیشن کے لیے نئی فرنچائز سیالکوٹ اسٹالینز نے آسٹریلوی اسٹار بلے باز اسٹیو اسمتھ کو براہ راست معاہدے کے ذریعے حاصل کر لیا ہے۔یہ معاہدہ پی ایس ایل کی تاریخ میں سب سے مہنگا ثابت ہوا ہے۔
ذرائع کے مطابق سیالکوٹ اسٹالینز نے اسمتھ کو 5 لاکھ امریکی ڈالر سے زائد رقم میں سائن کیا ہے، جو پاکستانی روپوں میں 14 کروڑ سے زیادہ بنتی ہے۔ اس رقم سے اسمتھ پی ایس ایل کے تمام ادوار میں سب سے زیادہ معاوضہ حاصل کرنے والے کھلاڑی بن گئے ہیں۔
ایک دوسری فرنچائز بھی اسمتھ کو یہی رقم دینے کو تیار تھی، مگر سیالکوٹ کے ساتھ معاملات طے پا گئے۔پی ایس ایل 11 میں اس بار آٹھ ٹیمیں شامل ہوں گی، جن میں دو نئی ٹیمیں سیالکوٹ اسٹالینز اور ایک اور نئی فرنچائز شامل ہیں۔
ٹورنامنٹ مارچ میں شروع ہوگا۔ پی سی بی نے اس سیزن کے لیے ہر فرنچائز کو ایک غیر ملکی کرکٹر سے براہ راست معاہدہ کرنے کی اجازت دی تھی، بشرطیکہ وہ پچھلے سیزن میں پی ایس ایل کا حصہ نہ رہا ہو۔
اسمتھ، جو 36 سالہ تجربہ کار بلے باز ہیں، پی ایس ایل میں اپنا ڈیبیو کریں گے اور سابق آسٹریلوی کپتان ٹم پین (جو سیالکوٹ کے ہیڈ کوچ ہیں) کے ساتھ مل کر ٹیم کو مضبوط کریں گے۔
دوسری جانب مقامی کھلاڑیوں کی بات کریں تو بابر اعظم کا ریٹینشن معاوضہ 7 کروڑ روپے ہے، جبکہ اسمتھ اس سے تقریباً دگنی رقم حاصل کریں گے۔
پرانی فرنچائزز کو اب صرف 4 کھلاڑی ریٹین کرنے کی اجازت ہے (پہلے 8 تھے)، جن میں سے بیشتر نے اپنے پلاٹینیئم کھلاڑیوں کو 7 کروڑ روپے معاوضہ دینے کا اعلان کیا ہے۔
نئی ٹیموں کی شمولیت سے کھلاڑیوں کی ڈیمانڈ میں اضافہ ہوا ہے، جس کی وجہ سے کئی کرکٹرز نے دیگر آفرز کا فائدہ اٹھا کر اپنی اصل ٹیموں سے معاوضہ بڑھوایا۔
بعض معاملات میں کاغذی معاہدہ سے زیادہ رقم بھی ادا کی جائے گی، مگر اعلان شدہ رقم ہی سرکاری طور پر سامنے آئے گی۔
یہ بڑی سائننگ پی ایس ایل کو مزید دلچسپ بنانے کا باعث بنے گی، جہاں عالمی شہرت یافتہ کھلاڑی پاکستانی ٹی20 لیگ کا رنگ بھریں گے۔
