UrduLead UrduLead
Related Articles
جیو انٹرٹینمنٹ کے مقبول اور سنسنی خیز ڈرامہ سیریل ’کیس نمبر 9‘ کا سفر آج اپنے انجام کو پہنچ جائے گا۔ ڈرامے کی آخری قسط آج رات ٹھیک 8 بجے ہرپل جیو پر نشر کی جائے گی، جس کا ناظرین کو بے صبری سے انتظار ہے۔
یہ ڈرامہ، جو ستمبر 2025 میں شروع ہوا تھا، ایک باہمت خاتون سحر کی جدوجہد کی کہانی ہے جو معاشرتی مسائل، خاص طور پر جنسی زیادتی کے کیس میں انصاف کی جنگ لڑتی ہے۔
معروف صحافی شاہزیب خانزادہ کی تحریر کردہ اس کہانی نے نہ صرف تفریح فراہم کی بلکہ معاشرتی شعور اجاگر کرنے میں بھی اہم کردار ادا کیا۔ ڈرامے میں عدالت کی کارروائی، وکلاء کی بحثیں، سوشل میڈیا کا کردار اور اثرورسوخ کے دباؤ کو بہت حقیقت پسندانہ انداز میں دکھایا گیا ہے۔
ڈرامے کی کاسٹ میں صبا قمر، فیصل قریشی، جنید خان اور آمنہ شیخ جیسے ستارے مرکزی کردار ادا کر رہے ہیں۔ صبا قمر نے متاثرہ خاتون کے کردار میں زبردست پرفارمنس دی ہے، جبکہ فیصل قریشی نے دفاع کے وکیل کا روپ نبھایا ہے۔
ڈرامے کی ہدایات سید وجاہت حسین نے دی ہیں اور یہ سیونتھ سکائی انٹرٹینمنٹ کی پروڈکشن ہے۔گذشتہ اقساط میں دیکھا گیا کہ کیس میں اہم موڑ آ چکے ہیں اور ناظرین یہ جاننے کو بے قرار ہیں کہ آخر انصاف کی جیت ہوگی یا نہیں۔ سیکنڈ لاسٹ ایپی سوڈ میں آئے ٹوئسٹ نے سوشل میڈیا پر خوب بحث چھیڑ دی تھی۔
ناظرین سے اپیل کی گئی ہے کہ وہ آج رات 8 بجے جیو ٹی وی ضرور ٹیون کریں اور اس دلچسپ ڈرامے کے اختتام کا حصہ بنیں۔ ڈرامہ آن لائن ہرپل جیو کے یوٹیوب چینل پر بھی دستیاب رہے گا۔
