UrduLead UrduLead
Related Articles
پنجاب حکومت نے صوبے کے تمام تعلیمی بورڈز میں امتحانی نظام کو جدید ٹیکنالوجی پر منتقل کرنے کا اصولی فیصلہ کر لیا ہے، جس کے تحت امتحانات کی ای مارکنگ کی جائے گی اور امتحانی مراکز پر طلبہ کی حاضری بائیومیٹرک سسٹم سے لی جائے گی۔
چیئرمین ٹاسک فورس برائے امتحانات پنجاب مزمل محمود نے میڈیا کو بریفنگ دیتے ہوئے بتایا کہ تمام تعلیمی بورڈز میں ای مارکنگ کا نظام متعارف کرایا جا رہا ہے تاکہ امتحانات کے نتائج میں مکمل شفافیت اور میرٹ کو یقینی بنایا جا سکے۔
انہوں نے کہا کہ اس منصوبے کا پائلٹ مرحلہ 2026 میں میٹرک اور انٹرمیڈیٹ کے کمپیوٹر سائنسز کے امتحانات سے شروع کیا جائے گا۔
مزمل محمود کے مطابق صوبے بھر کے تمام امتحانی مراکز میں ڈیجیٹل حاضری کا نظام نصب کیا جائے گا اور ہر طالب علم کی حاضری بائیومیٹرک تصدیق کے ذریعے ہوگی، جس سے نقل اور پراکسی کی روک تھام ممکن ہو سکے گی۔
انہوں نے مزید بتایا کہ یہ ڈیجیٹل اصلاحات کا جامع منصوبہ آئندہ تین سالوں میں مرحلہ وار مکمل طور پر نافذ العمل کر دیا جائے گا۔
چیئرمین ٹاسک فورس نے یہ بھی اعلان کیا کہ تمام تعلیمی بورڈز کے لیے سوالات کا ایک مرکزی اور یکساں بینک قائم کیا جائے گا، جس سے امتحانی پرچوں کے معیار میں بہتری اور صوبے بھر میں یکسانیت کو فروغ ملے گا۔ان اصلاحات سے پنجاب کے امتحانی نظام میں شفافیت، کارکردگی اور جدیدیت کا نیا دور شروع ہونے کی توقع ہے۔
