UrduLead UrduLead
Related Articles
پاکستان کرکٹ بورڈ (پی سی بی) کے چیئرمین محسن نقوی کی زیر صدارت بورڈ آف گورنرز کا اہم اجلاس ویڈیو لنک کے ذریعے منعقد ہوا، جس میں کرکٹ انفراسٹرکچر کی اپ گریڈیشن، پاکستان سپر لیگ (پی ایس ایل)، ڈومیسٹک کرکٹ اور آئندہ بین الاقوامی ایونٹس سے متعلق متعدد اہم فیصلے کیے گئے۔
اجلاس میں نیشنل کرکٹ اسٹیڈیم کراچی کی تعمیر نو کے دوسرے مرحلے کی باضابطہ منظوری دی گئی، جبکہ لاہور کے قذافی اسٹیڈیم (ایل سی سی اے گراؤنڈ) کو لندن کے تاریخی اوول گراؤنڈ کی طرز پر اپ گریڈ کرنے کا فیصلہ کیا گیا۔
بورڈ نے قذافی اسٹیڈیم کی اپ گریڈیشن کی منظوری دے دی۔ اس کے علاوہ چیئرمین پی سی بی نے اعلان کیا کہ اسلام آباد میں ایک اسٹیٹ آف دی آرٹ، عالمی معیار کا نیا کرکٹ اسٹیڈیم تعمیر کیا جائے گا۔پی ایس ایل کے حوالے سے بڑی خبر یہ ہے کہ لیگ میں دو نئی ٹیموں کی نیلامی 8 جنوری 2026 کو اسلام آباد میں ہوگی۔
چیئرمین محسن نقوی نے بتایا کہ پوری کوشش کی جائے گی کہ پی ایس ایل 11 کے میچز مظفرآباد اسٹیڈیم میں کرائے جائیں، اور مستقبل میں وہاں انٹرنیشنل میچز کے انعققاد کا بھی منصوبہ ہے۔
اجلاس میں پی ایس ایل کے لندن اور نیویارک روڈ شوز کی شاندار کامیابی پر چیئرمین محسن نقوی اور ان کی ٹیم کی انتھک محنت اور پروفیشنلزم کو زبردست خراج تحسین پیش کیا گیا۔ بورڈ ممبران نے سری لنکن ٹیم کے حالیہ دورے کو جاری رکھنے میں چیئرمین کی ذاتی کاوشوں کو بھی سراہا اور متفقہ طور پر اظہار تشکر کی قرارداد منظور کی۔
اس موقع پر محسن نقوی نے کہا کہ سری لنکن ٹور کو جاری رکھنے کا کریڈٹ کسی ایک فرد کو نہیں بلکہ پوری ٹیم کو جاتا ہے۔ “ہم نے اخلاص سے محنت کی اور اللہ تعالیٰ نے مدد فرمائی۔”
انہوں نے مزید کہا کہ پی ایس ایل روڈ شوز کی کامیابی بھی پوری ٹیم کی مشترکہ کاوش ہے اور پی ایس ایل کو عالمی برانڈ بنانے کے لیے سب نے شبانہ روز محنت کی۔
بورڈ کو آگاہ کیا گیا کہ ریجنل سطح پر کلبز کی سکروٹنی کا عمل ایک معروف نجی فرم نے شروع کر دیا ہے۔ چیف ایگزیکٹو آفیسر پی ایس ایل سلمان نصیر نے روڈ شوز کے حوالے سے تفصیلی بریفنگ دی۔
اجلاس میں آئی سی سی کے آئندہ ویمنز اور مینز ٹورنامنٹس، ڈومیسٹک کرکٹ کے ڈھانچے کو مضبوط بنانے اور نچلی سطح پر ٹورنامنٹس کی تعداد بڑھانے پر بھی تبادلہ خیال کیا گیا۔اس کے علاوہ ٹیسٹ کرکٹ کے لیے الگ ہیڈ کوچ کی تلاش کا فیصلہ بھی کیا گیا۔
اجلاس میں بورڈ آف گورنرز کے ممبران اسماعیل قریشی، طارق سرور، سجاد علی کھوکھر، انوار غنی، ظہیر عباس اور تنویر احمد نے شرکت کی۔ چیف آپریٹنگ آفیسر پی سی بی سمیر احمد، چیف ایگزیکٹو آفیسر پی ایس ایل سلمان نصیر، چیف فنانشل آفیسر، ڈائریکٹرز انفراسٹرکچر، ڈومیسٹک کرکٹ، کمرشل سمیت دیگر متعلقہ حکام بھی شریک تھے۔
پی سی بی کے یہ فیصلے پاکستان کرکٹ کے روشن مستقبل کی نوید ہیں، جس سے نہ صرف انفراسٹرکچر بہتر ہوگا بلکہ پی ایس ایل مزید دلچسپ اور عالمی سطح پر مقبول ہوگی
