UrduLead UrduLead
Related Articles
اینکر پرسن نے کہا دونوں نام میرے لیے محترم ہیں، علیحدگی کی خبریں بے بنیاد ہیں
پاکستان کی معروف صحافی اور اینکر پرسن فرح یوسف نے اپنے شوہر، معروف میزبان اقرار الحسن سے علیحدگی کی خبروں پر پہلی بار خاموشی توڑ دی ہے۔ سوشل میڈیا پر کئی دنوں سے ان دونوں کے درمیان تعلقات کے خاتمے کی افواہیں گردش کر رہی تھیں، جن پر فرح نے اپنے تازہ انٹرویو میں وضاحت پیش کی۔
یوٹیوب پوڈکاسٹ ”زاویہ“ میں گفتگو کے دوران ایک مداح نے فرح سے پوچھا کہ کیا وہ اقرار الحسن سے علیحدہ ہو چکی ہیں، کیونکہ ان کے سوشل میڈیا اکاؤنٹس پر اب صرف “فرح یوسف” نام دکھائی دیتا ہے۔ اس پر فرح نے مسکراتے ہوئے جواب دیا کہ ان کا والد کا نام ”یوسف“ ان کی پہچان ہے اور وہ اس پر فخر محسوس کرتی ہیں۔
انہوں نے کہا، ”بہت سے لوگ مجھے میرے والد کے نام سے جانتے ہیں، اور میرے لیے باپ کے رشتے سے زیادہ قیمتی کوئی رشتہ نہیں۔ میں نے کبھی کبھی سوچا کہ اپنی بایو میں ’فرح اقرار‘ کے بجائے دوبارہ ’فرح یوسف‘ لکھ دوں، کیونکہ دونوں نام میرے لیے قابلِ احترام ہیں۔“
فرح نے واضح کیا کہ ان کے کچھ پرانے سوشل میڈیا اکاؤنٹس ویریفائیڈ ہیں، اس لیے ان کے نام وہاں تبدیل نہیں کیے جا سکتے۔ تاہم، اس کا مطلب ہرگز یہ نہیں کہ ان کے اور اقرار الحسن کے درمیان کوئی اختلاف یا علیحدگی ہو چکی ہے۔
انہوں نے تمام افواہوں کی سختی سے تردید کرتے ہوئے کہا، ”ہمارے درمیان کوئی علیحدگی نہیں ہوئی، لوگ اپنی مرضی سے کہانیاں بنا لیتے ہیں۔ دونوں نام میرے لیے محترم ہیں اور میں ان دونوں کو اپنا سمجھتی ہوں۔“
فرح نے مداحوں سے اپیل کی کہ وہ غیر مصدقہ خبروں پر یقین نہ کریں اور صرف مستند ذرائع سے تصدیق شدہ معلومات پر بھروسہ کریں۔
واضح رہے کہ فرح یوسف نے 2007 میں ایک نجی ٹی وی چینل سے اپنے صحافتی کیریئر کا آغاز کیا تھا اور اب وہ اپنا ذاتی یوٹیوب چینل کامیابی سے چلا رہی ہیں۔ وہ اقرار الحسن کی دوسری اہلیہ ہیں، جبکہ اقرار الحسن کی تین شادیاں ہو چکی ہیں۔
