UrduLead UrduLead
Related Articles
پاکستان اور ملائیشیا کے درمیان ایف آئی ایچ نیشنز کپ کے افتتاحی میچ میں سنسنی خیز مقابلہ دیکھنے میں آیا جو 3-3 گول سے برابر رہا۔
یہ میچ اتوار کو نیشنل ہاکی اسٹیڈیم، کوالالمپور میں کھیلا گیا۔ میچ کے دوران پاکستان نے دو بار برتری حاصل کی لیکن وہ اسے برقرار نہ رکھ سکا۔
پاکستان کو آغاز میں احمد ندیم اور عبد الرحمن کے تیز رفتار دو گولوں کے باعث برتری حاصل ہوئی، جس کی بدولت قومی ٹیم تیسرے کوارٹر کے اختتام پر 0-2 کی برتری کے ساتھ چوتھے کوارٹر میں داخل ہوئی۔
تاہم، میزبان ٹیم ملائیشیا نے آخری کوارٹر میں شاندار واپسی کرتے ہوئے فطری ساری اور سید چولن کے گولز کی مدد سے مقابلہ برابر کر دیا۔
پاکستان نے ایک بار پھر سبقت حاصل کی جب رانا وحید اشرف نے گیند کو جال میں پہنچایا، مگر دو منٹ بعد ہی چولن نے ایک اور گول کرکے مقابلہ 3-3 سے برابر کر دیا۔ چولن کا یہ میچ میں دوسرا گول تھا۔
پاکستان اپنا دوسرا میچ پیر کو جاپان کے خلاف کھیلے گا۔
قابل ذکر ہے کہ اس ٹورنامنٹ کا فارمیٹ ابتدائی راؤنڈ میں پول میچز پر مشتمل ہے، جن کے بعد سرفہرست ٹیمیں 20 جون کو سیمی فائنل میں جگہ بنائیں گی جبکہ فائنل اور تیسری پوزیشن کا میچ 21 جون کو ہوگا۔
ٹورنامنٹ میں آٹھ ٹیمیں حصہ لے رہی ہیں، جنہیں دو گروپوں میں تقسیم کیا گیا ہے۔ پول اے میں فرانس، کوریا، جنوبی افریقہ اور ویلز شامل ہیں جبکہ پول بی میں جاپان، ملائیشیا، نیوزی لینڈ اور پاکستان کی ٹیمیں شامل ہیں۔
ایف آئی ایچ ہاکی نیشنز کپ ان ٹیموں کے لیے ایک اہم مرحلہ ہے جو ایف آئی ایچ ہاکی پرو لیگ میں جگہ بنانے کی خواہاں ہیں۔ ٹورنامنٹ جیتنے والی ٹیم کو 2025-26 کے پرو لیگ سیزن میں پروموشن حاصل ہوگا۔
پاکستانی اسکواڈ برائے نیشنز کپ:
اماد بٹ (کپتان)، رانا وحید (نائب کپتان)، منیر الرحمان، عبداللہ اسحاق، محمد عبداللہ، محمد سفیان خان، عبد المنان، حماد انجم، ارشد لیاقت، معین شکیل، زکریا حیات، غضنفر علی، سلمان رزاق، جنید منظور، افراز خان، عبد الرحمن، احمد ندیم اور محب اللہ۔
