UrduLead UrduLead
Related Articles
پاکستان کے معروف گلوکار اور اداکار فرحان سعید نے حالیہ دنوں بھارتی حکومت کی جانب سے پاکستانی فنکاروں کے سوشل اور ڈیجیٹل میڈیا پلیٹ فارمز پر پابندی کے فیصلے پر دلچسپ اور طنزیہ انداز میں ردعمل دیا ہے۔
فرحان سعید، جنہوں نے اُڈاری، سنو چندا، پریم گلی اور میرے ہمسفر جیسے مشہور ڈراموں سے مقبولیت حاصل کی، ان دنوں ڈرامہ شیریں فرہاد میں اپنی شاندار اداکاری سے مداحوں کو متاثر کر رہے ہیں۔
ان کے انسٹاگرام پر فالوورز کی تعداد 40 لاکھ سے زیادہ ہے، جس سے ان کی بین الاقوامی مقبولیت کا اندازہ لگایا جا سکتا ہے۔
اداکار نے انسٹاگرام پر اپنے پیغام میں لکھا: ”بات جنگ سے شروع ہو کر ہائی اسکول والی بلاکنگ پر آ گئی ہے! یہ آپ کا نقصان ہے۔ ان تمام بھارتی مداحوں کو محبت بھیجتا ہوں جو اس پابندی کا شکار بنے، اور دعا ہے کہ عقل و فہم غالب آئے تاکہ آپ اپنے پسندیدہ فنکاروں کو دوبارہ دیکھ سکیں۔“
ان کے اس بیان نے سوشل میڈیا پر کافی توجہ حاصل کی۔ کچھ صارفین نے ان کے انداز کو نرمی، امن اور مزاح کا حسین امتزاج قرار دیا، جب کہ بعض نے رائے دی کہ پاکستانی فنکاروں کو بھارت کی طرف سے پھیلائے جانے والے فریب اور فلیگ آپریشنز کو بھی اجاگر کرنا چاہیے۔
https://www.instagram.com/reel/DI521KmNtSc
دوسری جانب، بھارتی شائقین بھی چپ نہ بیٹھے۔ کئی مداحوں نے وی پی این کا استعمال کرتے ہوئے شیریں فرہاد کو دیکھنا جاری رکھا اور ڈرامے کے اسکرین شاٹس فرحان سعید کو بھیجے، جنہیں اداکار نے خود اپنے سوشل میڈیا پر شیئر کر کے مداحوں سے محبت کا اظہار کیا۔
https://www.instagram.com/reel/DFe0unzNyqW
فرحان سعید کا یہ ردعمل نہ صرف سیاسی تناؤ کے ماحول میں ایک نرم پیغام تھا بلکہ اس نے یہ حقیقت بھی ظاہر کی کہ فن اور محبت کو سرحدیں نہیں روک سکتیں۔ سچے مداح اپنے پسندیدہ فنکار تک پہنچنے کا راستہ خود ڈھونڈ لیتے ہیں — چاہے راہیں محدود ہی کیوں نہ ہوں۔
