UrduLead UrduLead
Related Articles
پاکستانی یوٹیوبر ساجد رحمان (زلمی) نے دنیا کے صف اول کے یوٹیوبر مسٹر بیسٹ (جمی ڈونلڈ سن) کے ساتھ اشتراک کرلیا۔
پاکستانی نژاد امریکی ڈیجیٹل تخلیق کار زلمی، جن کا اصل نام ساجد رحمان ہے، تیزی سے یوٹیوب کی دنیا کے بااثر افراد میں شامل ہونے لگے ہیں،
حال ہی میں انہوں نے اپنے یوٹیوب چینل پر مسٹر بیسٹ سے ملاقات کی ویڈیو بھی اپ لوڈ کی ہے جسے 24 گھنٹے کے اندر 15 لاکھ سے زائد لوگ دیکھ چکے ہیں، جبکہ مسٹر بیسٹ نے زلمی کو اپنے اسٹوڈیو کا دورہ بھی کروایا۔
ساجد رحمان جو سوشل میڈیا پر زلمی کے نام سے مشہور ہیں، انہوں نے یوٹیوب پر اپنے مختلف چینلز بنائے، جہاں وہ گیمنگ ویڈیو اور لائف اسٹائل کے ساتھ مزاح کی ویڈیوز بھی بناتے رہتے ہیں۔
مارچ 2022 میں “ایف ایم ریڈیو کے خراٹے” کے عنوان سے اپنی پہلی ویڈیو اپ لوڈ کرکے انہوں نے کریئر کا آغاز کیا۔ تاہم ان کا بڑا بریک تھرو 11 جنوری 2023 کو آیا، جب انہوں نے اپنے بیٹے کے ساتھ ایک چیلنج ویڈیو پوسٹ کی، جس کا عنوان تھا “24 گھنٹوں میں 1 لاکھ روپے خرچ کرنے کا چیلنج”۔ یہ ویڈیو وائرل ہوگئی اور لاکھوں ویوز کے ساتھ ان کے چینل کو بلندیوں پر پہنچا دیا۔
زلمی اب تک لاکھوں سبسکرائبرز اور کروڑوں ویوز حاصل کر چکا ہے اور اپنی خاندانی زندگی، ایڈونچرز اور گیمنگ کو ناظرین کے ساتھ بانٹنے کا سلسلہ جاری رکھے ہوئے ہے۔ ان کے چاہنے والے دنیا بھر میں پھیلے ہوئے ہیں۔
حال ہی میں زلمی کو عالمی شہرت اس وقت ملی جب انہوں نے یوٹیوب سپر اسٹار مسٹر بیسٹ کا 50 گھنٹوں پر مشتمل آئس لینڈ سروائیول چیلنج مکمل کیا۔
مزید برآں زلمی نے حال ہی میں ایک ویڈیو “Zalmi x MrBeast پاکستان کا سب سے بڑا اشتراک (کولیبریشن) جلد آ رہا ہے” کے عنوان سے ریلیز کی، جس نے پاکستانی یوٹیوب کمیونٹی میں بےحد جوش و خروش پیدا کر دیا ہے۔
یہ اشتراک جو ممکنہ طور پر پاکستان کی یوٹیوب تاریخ کا سب سے بڑا اشتراک ہو سکتا ہے، شائقین اس کا بڑی بےچینی سے انتظار کررہے ہیں۔
