UrduLead UrduLead
Related Articles
ٹماٹر، آلو اور مرغی کی قیمتوں میں نمایاں بڑھوتری
پاکستان بیورو شماریات (PBS) کی جانب سے جاری کردہ اعداد و شمار کے مطابق 18 جون 2026 کو ختم ہونے والے ہفتے کے دوران حساس قیمتوں کے اشاریے (SPI) کی بنیاد پر ہفتہ وار مہنگائی کی شرح میں 0.46 فیصد اضافہ ریکارڈ کیا گیا، جس کی بڑی وجہ اشیائے خور و نوش اور روزمرہ استعمال کی متعدد ضروری اشیا کی قیمتوں میں اضافہ ہے۔
پاکستان بیورو شماریات کے مطابق حساس قیمتوں کا اشاریہ ملک کے 17 شہروں کی 50 مارکیٹوں سے 51 بنیادی اشیا کی قیمتوں کی بنیاد پر مرتب کیا جاتا ہے تاکہ قلیل مدت میں مہنگائی کے رجحان کا اندازہ لگایا جا سکے۔
رپورٹ کے مطابق ہفتہ وار بنیادوں پر ٹماٹر کی قیمت میں سب سے زیادہ 16.65 فیصد اضافہ ریکارڈ کیا گیا۔ اسی طرح آلو 6.82 فیصد، مرغی 5.60 فیصد، واشنگ صابن 1.16 فیصد، گڑ 0.65 فیصد، مٹن اور ایل پی جی 0.51 فیصد، شیٹنگ 0.48 فیصد، لانگ کلاتھ 0.43 فیصد، انڈے 0.35 فیصد، تازہ دودھ 0.29 فیصد اور دہی 0.26 فیصد مہنگے ہوئے۔
دوسری جانب بعض اشیا کی قیمتوں میں کمی بھی دیکھی گئی۔ پیاز کی قیمت میں 2.98 فیصد، لہسن میں 2.51 فیصد، کیلے میں 1.28 فیصد، پیٹرول میں 1.06 فیصد، ماش کی دال میں 1.04 فیصد، پسا ہوا نمک 0.95 فیصد، مونگ کی دال 0.61 فیصد، آٹا 0.53 فیصد، ڈیزل 0.51 فیصد اور چنے کی دال 0.04 فیصد سستی ہوئی۔
اعداد و شمار کے مطابق زیرِ جائزہ ہفتے کے دوران 51 اشیا میں سے 25 اشیا کی قیمتوں میں اضافہ، 11 اشیا کی قیمتوں میں کمی جبکہ 15 اشیا کی قیمتیں مستحکم رہیں۔
سالانہ بنیادوں پر حساس قیمتوں کے اشاریے میں 15.28 فیصد اضافہ ریکارڈ کیا گیا، جو ملک میں برقرار مہنگائی کے دباؤ کی نشاندہی کرتا ہے۔
سالانہ بنیاد پر سب سے زیادہ اضافہ پیاز کی قیمت میں 79.76 فیصد ریکارڈ کیا گیا، جبکہ ٹماٹر 68.59 فیصد، بجلی کے سہ ماہی چارجز 59.40 فیصد، آٹا 58.72 فیصد، ایل پی جی 52.66 فیصد، پیٹرول 44.73 فیصد، ڈیزل 44.39 فیصد، مٹن 16.30 فیصد، سرخ مرچ پاؤڈر 15.20 فیصد، گائے کا گوشت 12.86 فیصد، لہسن 10.74 فیصد اور روٹی 8.67 فیصد مہنگی ہوئی۔
اس کے برعکس گزشتہ سال کے مقابلے میں آلو کی قیمت میں 41.09 فیصد، انڈوں میں 26.98 فیصد اور چنے کی دال میں 22.32 فیصد کمی ریکارڈ کی گئی، جبکہ چینی سمیت بعض دیگر اشیا بھی نسبتاً سستی ہوئیں۔
ماہرین کے مطابق اگرچہ حالیہ ہفتوں میں پیٹرولیم مصنوعات اور چند زرعی اجناس کی قیمتوں میں کمی دیکھی گئی ہے، تاہم خوراک اور یوٹیلیٹی اخراجات میں مسلسل اضافہ عوامی سطح پر مہنگائی کے دباؤ کو برقرار رکھے ہوئے ہے۔
