UrduLead UrduLead
Related Articles
پاکستان سپر لیگ (پی ایس ایل) کی تاریخ میں پہلی بار لیگ کو آٹھ ٹیموں تک توسیع دینے کے لیے دو نئی فرنچائزز کی نیلامی کل (8 جنوری 2026) کو جناح کنونشن سینٹر اسلام آباد میں منعقد ہوگی۔
نیلامی کا آغاز شام 4 بج کر 15 منٹ پر ہوگا۔پی سی بی کے مطابق، پی ایس ایل سیزن 11 میں ٹیموں کی تعداد چھ سے بڑھ کر آٹھ ہو جائے گی، جو لیگ کے نئے دور کی آغاز کی عکاسی کرتا ہے۔
اس ایونٹ کا آفیشل ہیش ٹیگ #NewEra رکھا گیا ہے۔نیلامی کا عمل براہ راست پی سی بی اور پی ایس ایل کے آفیشل یوٹیوب چینلز کے علاوہ ٹیپ میڈ، تماشا اور دیگر پلیٹ فارمز پر دیکھا جا سکے گا۔
اس کے علاوہ اے اسپورٹس، جیو اسپورٹس، فاسٹ اسپورٹس اور پی ٹی وی اسپورٹس سمیت متعدد ٹی وی چینلز بھی نیلامی کو لائیو نشر کریں گے۔ذرائع کے مطابق، نئی ٹیموں کی خریداری کے لیے 10 اہل کمپنیوں اور گروپس کے درمیان شدید مقابلہ متوقع ہے۔
شارٹ لسٹ کی گئی کمپنیوں میں ایم نیکسٹ، ڈہرکی شوگر ملز، ایف کے ایس، پرزم ڈیولپرز، انوریکس سولر، جاز، آئی ٹو سی (i2c)، ولی ٹیکنالوجیز، ویگو ٹیل اور اوزی ڈیولپرز شامل ہیں۔
پی سی بی حکام نے بتایا کہ نئی فرنچائزز کے ممکنہ شہروں میں فیصل آباد، گلگت، حیدرآباد، مظفرآباد، راولپنڈی اور سیالکوٹ شامل ہیں، تاہم شہروں کا حتمی انتخاب نیلامی کے کامیاب بولی دہندگان کریں گے۔
پی ایس ایل سیزن 11 کا شیڈول 26 مارچ سے 3 مئی 2026 تک طے ہے۔ نیلامی کے بعد ایک خصوصی تقریب بھی ہوگی جس میں عالمی شہرت یافتہ گلوکار راحت فتح علی خان لائیو پرفارمنس پیش کریں گے۔
اس موقع پر پاکستان شاہینز اور ہانگ کانگ سپر سکسز کی فاتح ٹیموں کو بھی انعامات سے نوازا جائے گا۔
پی سی بی کا کہنا ہے کہ یہ توسیع لیگ کی مقبولیت اور کاروباری اپیل کو مزید بڑھائے گی، جس سے کرکٹ شائقین کو زیادہ دلچسپ مقابلے دیکھنے کا موقع ملے گا۔
