UrduLead UrduLead
Related Articles
پاکستان سپر لیگ (پی ایس ایل) 10 کے تیسرے میچ میں کراچی کنگز نے ملتان سلطانز کو چونکا دیا، 235 رنز کا ہدف آخری اوور میں 6 وکٹوں کے نقصان پر پورا کرلیا۔
پہاڑ جیسے ہدف کے تعاقب میں جہاں ایک موقع پر کراچی کنگز 79 رنز پر 4 وکٹوں سے محروم ہوئی تو جیمز ونس اور خوشدل شاہ نے اپنی دھواں دار بیٹنگ کی بدولت سلطانز سے یقینی جیت چھین لی۔
جیمز ونس نے سنچری بناتے ہوئے 43 گیندوں پر 101 رنز کی اننگز کھیلی جس میں 4 چھکے اور 14 چوکے شامل تھے۔
دوسرے اینڈ پر موجود خوشدل شاہ نے 60 رنز بنانے کےلیے 37 گیندوں کا سامنا کیا۔ انکی اننگز میں 4 چھکے اور 5 چوکے شامل تھے۔
کراچی کنگز نے آخری اوور میں 6 وکٹوں کے نقصان پر 235 رنز کا ہدف حاصل کرلیا۔
پاکستان سپر لیگ کے دسویں ایڈیشن کے تیسرے میچ میں ملتان سلطانز نے کپتان محمد رضوان کی ناقابل شکست جارحانہ سینچری کی مدد سے کراچی کنگز کو جیت کے لیے 235 رنز کا ہدف دیا ہے۔
کراچی کے نیشنل بینک اسٹیڈیم میں کھیلے جارہے میچ میں کراچی کنگز کے کپتان ڈیوڈ وارنر نے ٹاس جیتا اور ملتان سلطانز کو بیٹنگ کی دعوت دی۔
ملتان سلطانز کی جانب سے کپتان محمد رضوان اور شائے ہوپ نے اننگز کا آغاز کیا، شائے ہوپ صرف 8 رنز بنانے کے بعد حسن علی کا شکار بنے جب کہ عثمان خان بھی 19 رنز بنانے کے بعد اپنی وکٹ گنوا بیٹھے، تاہم اس موقع پر ملتان سلطانز نے صرف 9 اوورز میں 2 وکٹوں پر 82 رنز بنا لیے تھے۔
چوتھے نمبر پر بیٹنگ کے لیے کامران غلام میدان میں اترے، اور کپتان رضوان کے ساتھ مل کر 15ویں اوور میں ٹیم کا مجموعی اسکور 145 رنز تک پہنچا دیا، تاہم اس موقع پر کامران غلام 19 گیندوں پر جارحانہ 36 رنز بنا کر ہمت ہار بیٹھے، ان کی اننگز میں ایک چھکا اور 5 چوکے شامل تھے۔
محمد رضوان کا ساتھ دینے مائیکل بریس ویل کریز پر آئے اور شاندار بیٹنگ کا مظاہرہ کرتے ہوئے صرف 17 گیندوں پر 3 چھکوں اور 5 چوکوں کی مدد سے 44 رنز کی ناقابل شکست اننگز کھیلی۔
دوسرے اینڈ پر کپتان رضوان بھی آج جارحانہ موڈ میں نظر آئے اور 5 چھکوں اور 9 چوکوں کے ساتھ 63 گیندوں پر 105 رنز بنا کر ناٹ آؤٹ رہے، اس طرح 20 اوورز میں ملتان سلطان نے 3 وکٹیں کھو کر 234 رنز بنائے اور کراچی کنگز کو جیت کے لیے 235 رنز کا ہدف دیا۔
کراچی کنگز کی جانب سے حسن علی، عباس آفریدی اور خوشدل شاہ نے ایک، ایک وکٹ حاصل کی۔
اس سے قبل، پی ایس ایل 10 کے دونوں میچ راولپنڈی میں کھیلے گئے، گزشتہ روز کھیلے گئے میچ میں اسلام آباد یونائیٹڈ نے لاہور قلندرز کو شکست دی جب کہ آج کے میچ میں کوئٹہ گلیڈی ایٹرز نے پشاور زلمی کے خلاف میچ میں کامیابی حاصل کی۔
