UrduLead UrduLead
Related Articles
فیڈرل بورڈ آف انٹر میڈیٹ اینڈ سیکنڈری ایجوکیشن اسلام آباد نے سال 2024کے جماعت نویں اور دسویں کے سالانہ امتحانات کے نتائج کا اعلان کردیا۔
نتائج کے مطابق نویں جماعت میں پاس ہونے والے طلباءکا تناسب %58.71 جبکہ جماعت دسویں میں پاسنگ پرسنٹیج %88.20 رہی ۔
وفاقی تعلیمی بورڈ کی جانب سے جاری کردہ نتائج کے مطابق میٹرک کے سائنس گروپ میں آرمی پبلک سکول ای ایم ای کالج کیمپس پشاور روڈ راولپنڈی سے تعلق رکھنے والی ز بیدیا نصیب نے 1087 نمبر لے کر پہلی پوزیشن حاصل کی،گلوبل سکول سسٹم 115 رینج روڈ سبزار راولپنڈی کینٹ سے حجاب فاطمہ 1085 نمبر لے کر دوسری ، آرمی پبلک سکول گولڑہ کیمپ راولپنڈی کینٹ سے مصدق شہباز اور فوجی فاو¿نڈیشن ماڈل سکول مورگاہ کیمپس صفا ٹاون راولپنڈی سے فاطمہ واجد 1084 نمبر لے کر تیسری پوزیشن حاصل کی۔
اسی طرح ہیومنٹیز گروپ میں فیو چر فاو¿نڈیشن سکول مصریال روڈ راولپنڈی کینٹ سے تعلق رکھنے والی اقصی فاروق نے 1032 نمبر لے کر پہلی ،ڈی ایچ اے سنیئر سکول برائے خواتین ڈی ایچ اے لاہور سے اونائزہ جلیل نے 1025 نمبر حاصل کر کے دوسری ،انسٹیٹیوٹ آف اسلامک سائنس سترا میل اسلام آباد سے محمد انس نے 1014 نمبر لے کر تیسری پوزیشن حاصل کی۔
تقریب سے خطاب کرتے ہوئے چیئرمین وفاقی تعلیمی بورڈ سید جنید اخلاق نے وفاقی سیکرٹری تعلیم کو امتحانی نظام کے بارے میں بریف کیا اور پوزیشن حاصل کرنے والے بچوں کو مبارکباد پیش کی۔
اس موقع پر مہمان خصوصی وفاقی سیکرٹری تعلیم محی الدین احمد وانی نے خطاب کرتے ہوئے کہا کہ مجھے خوشی ہے کہ بطور سیکرٹری تعلیم ذمہ داریاں نبھانے کا موقع ملا ہے۔ یہ ہماری کامیابی ہے کہ آج دنیا بھر میں پاکستانی ہونہار بچے اپنا مقام رکھتے ہیں۔
انہوں مزید کہا کہ ہم سرکاری سکولوں میں تعلیم کے معیار کو بہتر بنانے کیلئے کوشاں ہیں۔ میں کامیاب ہونے والے ہونہار طلباءکو مبارکباد پیش کرتا ہوں۔ آخر میں وفاقی سیکرٹری تعلیم محی الدین احمد وانی، چیئرمین فیڈرل بورڈ سید جنید اخلاق اور سیکرٹری فیڈرل بورڈ ڈاکٹر بشیر خان نے پوزیشن حاصل کرنے والے بچوں میں انعامات تقسیم کیے۔
