UrduLead UrduLead
Related Articles
وزارت خارجہ نے ناروے کے سفیر کو پاکستان کے اندرونی معاملات میں مداخلت پر سخت ترین الفاظ میں ڈیمارش جاری کر دیا ہے۔
یہ اقدام 11 دسمبر 2025 کو ناروے کے سفیر کی جانب سے سپریم کورٹ آف پاکستان میں ایمان مزاری کیس کی سماعت میں شرکت کے بعد اٹھایا گیا۔
وزارت خارجہ نے اسے سفارتی حدود سے تجاوز اور پاکستان کے عدالتی معاملات میں براہ راست مداخلت قرار دیا ہے۔
وزارت خارجہ کے مطابق، سفیر کی یہ شرکت ویانا کنونشن 1961 کے آرٹیکل 41 کی کھلی خلاف ورزی ہے، جو سفارت کاروں کو میزبان ملک کے قوانین کا احترام کرنے اور اس کے اندرونی معاملات میں عدم مداخلت کا پابند بناتا ہے۔
دفتر خارجہ نے واضح کیا کہ کسی بھی ملک کا سفیر حساس اور زیر سماعت مقدمے میں موجود ہو کر عدالتی عمل کو متاثر کرنے یا اس پر اثر انداز ہونے کا تاثر دے تو یہ سفارتی ذمہ داریوں اور بین الاقوامی قوانین کی سنگین خلاف ورزی تصور ہوتی ہے۔
وزارت خارجہ نے مزید کہا کہ یہ پہلا واقعہ نہیں ہے۔ شواہد موجود ہیں کہ ناروے کی مختلف این جی اوز، خصوصاً انسانی حقوق کے نام پر سرگرم تنظیمیں، پاکستان میں ایسے عناصر کی حمایت اور انہیں پلیٹ فارم فراہم کرتی ہیں جو پاکستان مخالف سرگرمیوں میں ملوث ہیں۔
ڈیمارش جاری کرتے ہوئے پاکستان نے انتہائی غیر ذمہ دارانہ طرز عمل پر ناروے کے سفیر کو سخت تنبیہ کی اور واضح کیا کہ اسلامی جمہوریہ پاکستان اپنے اندرونی معاملات میں کسی بھی قسم کی مداخلت برداشت نہیں کرے گا۔
یہ اقدام پاکستان کی خودمختاری اور عالمی سفارتی اصولوں کے مطابق اپنی آزادی کے تحفظ کا واضح ثبوت ہے کہ پاکستان ایک آزاد، خودمختار اور قانون پر عملدرآمد کرنے والی Hard State ہے۔
