UrduLead UrduLead
Related Articles
محکمہ موسمیات نے آج سے ملک کے مختلف علاقوں میں بارشوں کا نیا سلسلہ شروع ہونے کی پیشگوئی کرتے ہوئے شہریوں کو احتیاط برتنے کی ہدایت کی ہے۔
رپورٹ کے مطابق مغربی ہواؤں کا نیا سلسلہ بلوچستان کے راستے ملک میں داخل ہو چکا ہے، جو آئندہ چند روز تک بالائی اور وسطی علاقوں کو متاثر کرے گا۔
اسلام آباد، لاہور، پشاور، کوئٹہ اور کشمیر کے پہاڑی علاقوں میں کہیں ہلکی اور کہیں تیز بارش کے امکانات ہیں۔ اس دوران ژالہ باری اور پہاڑی علاقوں میں برفباری کا بھی امکان ظاہر کیا گیا ہے۔
محکمہ موسمیات کے مطابق پنجاب کے جنوبی اضلاع میں گرد آلود ہوائیں چلنے کے ساتھ وقفے وقفے سے ہلکی بارش متوقع ہے۔
کراچی سمیت سندھ کے بیشتر علاقوں میں موسم خشک رہے گا، تاہم حیدرآباد، دادو اور لاڑکانہ میں بعض مقامات پر ہلکی بارش یا بوندا باندی کا امکان رد نہیں کیا جا سکتا۔ بلوچستان کے شمالی حصوں میں تیز ہواؤں کے ساتھ بارش متوقع ہے، جس سے درجہ حرارت میں کمی آئے گی۔
ماہرینِ موسمیات نے کسانوں کو فصلوں کی حفاظت کے لیے احتیاطی اقدامات کرنے کی ہدایت کی ہے، جبکہ شہری علاقوں میں نچلے مقامات پر پانی جمع ہونے کے خدشے کے پیشِ نظر انتظامیہ کو الرٹ رہنے کا کہا گیا ہے۔
محکمہ موسمیات کے مطابق بارشوں کا یہ سلسلہ جمعہ تک وقفے وقفے سے جاری رہنے کا امکان ہے۔
