UrduLead UrduLead
Related Articles
آئی سی سی چیمپئنز ٹرافی 2025 کے پہلے سیمی فائنل میں بھارت نے آسٹریلیا کو 4 وکٹوں سے شکست دے کر فائنل میں رسائی حاصل کرلی۔
پاکستان کی میزبانی میں ہونے والے انٹرنیشنل کرکٹ کونسل کے اہم ایونٹ کا پہلا سیمی فائنل دبئی کرکٹ اسٹیڈیم میں کھیلا جارہا ہے، جہاں آسٹریلیا کی پوری ٹیم پہلے بیٹنگ کرتے ہوئے 49.3 اوورز میں 264 رنز پر ڈھیر ہوگئی۔
ہدف کے تعاقب میں بھارت کی جانب سے ویرات کوہلی نے ایک بار پھر ذمہ دارانہ اننگز کھیلتے ہوئے ٹیم کی جیت میں اہم کردار ادا کیا، بھارت نے ویرات کوہلی کے 84 رنز کی بدولت مطلوبہ ہدف 2 اوورز پہلے ہی حاصل کرلیا۔
بھارت بیٹنگ
بھارت کی جانب سے اننگز کا آغاز کرنے والے کپتان روہت شرما کو ابتدائی اوورز میں ہی دو مواقع ملے لیکن اس کے باوجود وہ بڑی اننگز کھیلنے میں ناکام رہے، شرما 28 رنز بناکر آؤٹ ہوئے جب کہ شبمن گل 8 رنز ہی بناسکے۔
کم ہدف کے باوجود آسٹریلیا کی جانب سے انتہائی ناقص فیلڈنگ کا مظاہرہ کیا گیا، روہت کے بعد ویرات کوہلی کو بھی ایک موقع دیا گیا جس کے باعث وہ شریاس ایئر کے ساتھ ملکر 91 رنز کی اہم شراکت قائم کرنے میں کامیاب رہے۔
شریاس ایئر 45 رنز بناکر آؤٹ ہوئے تو اکشر پٹیل نے بھی 27 رنز کی اننگز کھیل کر جیت میں اپنا حصہ ڈالا، ہارد پانڈیا نے 28 رنز کی جارحانہ اننگز کھیلی جب کہ کے ایل راہل 42 رنز پر ناٹ آؤٹ رہے۔
بھارت کی جیت میں ویرات کوہلی نے اہم کردار ادا کیا، انہوں نے نہ صرف اپنی نصف سینچری مکمل کی بلکہ وہ 98 گیندوں پر 84 رنز کی اننگز کھیل کر آؤٹ ہوئے جس میں صرف 5 چوکے شامل تھے۔
آسٹریلیا کی جانب سے ایڈم زمپا اور ناتھ ایلس نے 2،2 جب کہ بین دوارسوئس اور کوپر کونولی کے حصے میں ایک ایک وکٹ آئی۔
آسٹریلیا بیٹنگ
اس سے قبل، بھارت کے خلاف ٹاس جیت کر بیٹنگ کا فیصلہ کیا، کینگروز کی جانب سے جارح مزاج اوپننگ بلے باز میٹ شارٹ کے ان فٹ ہونے پر نوجوان بلے باز کوپر کونولی کو ٹیم میں شامل کیا گیا لیکن وہ کھاتہ کھولے بغیر ہی محمد شامی کا شکار بن گئے۔
بھارت کے خلاف ہمیشہ اچھی کارکردگی دکھانے والے دوسرے اوپنر ٹرویس ہیڈ نے 33 گیندوں پر 39 رنز کی جارحانہ اننگز کھیلی، وہ ورون چکرورتی کا شکار بنے، مارنس لبوشین 29 اور جوش انگلس 11 رنز کے مہمان ثابت ہوئے۔
کپتان اسٹیو اسمتھ نے اپنی نصف سینچری مکمل کی اور 36 اوورز میں تقریباً 200 رنز بورڈ پر ہونے کے باوجود اسمتھ جلد بازی میں دکھائی دیے اور ایک غلط شارٹ کھیلتے ہوئے انہوں نے اپنی وکٹ گنوادی، وہ 96 گیندوں پر 73 رنز بنانے کے بعد آؤٹ ہوئے۔
گلین میکسوئل نے پہلی گیند پر چھکا لگایا اور اگلی ہی گیند پر اکثر پٹیل نے میکسوئل کو کلین بولڈ کرکے کینگروز کی پریشانی میں اضافہ کردیا۔
الیکس کیری نے ذمہ داری کا مظاہرہ کرتے ہوئے نصف سینچری اسکور کی، وہ آخر تک وکٹ پر ڈٹے رہے لیکن بدقسمتی سے نصف سینچری مکمل کرنے کے بعد 61 رنز پر رن آؤٹ ہوگئے۔
بھارت کی جانب سے محمد شامی نے 3، رویندرا جدیجا اور ورون چکرورتی نے 2،2 جب کہ اکشر پٹیل اور ہاردک پانڈیا نے ایک ایک وکٹ حاصل کی۔
ٹاس کے بعد گفتگو کرتے ہوئے آسٹریلوی کپتان اسٹیو اسمتھ نے کہا کہ خشک وکٹ ہے، پہلے بیٹنگ کرکے اسکور بورڈ پر اچھا مجموعہ ترتیب دینے کی کوشش کریں گے۔
وکٹ سے متعلق پوچھے گئے سوال پر آسٹریلوی کپتان نے کہاکہ پاکستان کے مقابلے میں دبئی کی وکٹ کافی خشک ہے جوکہ گیند کے ٹرن ہونے میں مدد گار ثابت ہوگی، اسی لیے ہم پہلے بیٹنگ کرکے اسکور بورڈ پر اچھا مجموعہ ترتیب دیکر مخالف ٹیم کو دباؤ میں لینا چاہتے ہیں۔
بھارتی کپتان روہت شرما نے کہا کہ اگر وہ ٹاس جیت جاتے تو شاید باؤلنگ یا پھر بیٹنگ کرنا چاہتے، دراصل دبئی کی وکٹ بہت مختلف ہے اور اگر آپ شش و پنج میں مبتلا ہوں تو ٹاس ہارنا ہی بہتر ہوتا ہے۔
انہوں نے بتایا کہ سیمی فائنل کے لیے بھی انہوں نے ٹیم میں کوئی تبدیلی نہیں کی اور 4 اسپنرز اور 2 فاسٹ باؤلرز کے ساتھ میدان میں اترنے کا فیصلہ کیا ہے۔
