UrduLead UrduLead
Related Articles
وفاقی وزیر برائے داخلہ تجارت و صنعت، ڈاکٹر گوہر اعجاز نے پاکستان کی برآمدات میں مثبت رجحان کا اعلان کیا۔ وزیر نے کہا، “الحمدللہ، جنوری 2024 میں پاکستان کی برآمدات جنوری 2023 کے 2.195 بلین ڈالر سے 26.9 فیصد بڑھ کر 2.786 بلین ڈالر ہوگئی ہیں۔
اسی مدت کے دوران درآمدات 4.884 بلین ڈالر سے 4.5 فیصد کم ہوکر 4.665 بلین ڈالر ہوگئیں۔ تجارتی خسارہ جنوری 2024 میں کم ہو کر 1.879 بلین ڈالر ہو گیا جو جنوری 2023 میں 2.689 بلین ڈالر تھا۔ یہ پچھلے سال کے مقابلے میں مثبت رحجان ہے۔
جولائی-جنوری 2024 کی مدت میں پاکستان کے عالمی تجارتی اعداد و شمار ظاہر کرتے ہیں کہ پاکستان اپنے بین الاقوامی تجارتی حجم کو مسلسل بڑھا رہا ہے۔ برآمدات مجموعی طور پر 17.766 بلین ڈالر رہیں، جو گزشتہ مالی سال کے اسی عرصے کے دوران 15.831 بلین ڈالر سے 12 فیصد زیادہ ہیں۔
گزشتہ مالی سال کی اسی مدت میں 35.836 بلین ڈالر کے مقابلے میں درآمدات 16- فیصد کم ہوکر 30.010 بلین ڈالر ہوگئیں۔ مجموعی تجارتی خسارہ پچھلے سال 20.005 ڈالر کے مقابلے میں 39- فیصد کم ہو کر 12.244 بلین ڈالر ہو گیا ہے۔ جولائی-جنوری 2024 کے دوران، برآمدات میں تقریباً 2 بلین ڈالر کا اضافہ ہوا، درآمدات میں تقریباً 6 بلین ڈالر کی کمی واقع ہوئی، جب کہ تجارتی خسارہ 7.8 بلین ڈالر کم ہوا۔
وزیر گوہر اعجاز نے اعداد و شمار پر تبصرہ کرتے ہوئے کہا، “یہ مثبت رجحانات تجارت اور اقتصادی ترقی کو فروغ دینے کے لیے ہماری حکومت کے غیر متزلزل عزم کی عکاسی کرتے ہیں۔ ہم ایسی پالیسیوں پر عمل درآمد جاری رکھیں گے جو ہمارے برآمد کنندگان کو معاونت فراہم کریں، ہماری برآمدات کی بنیاد کو متنوع بنائیں، اور تجارتی سہولتوں کو بڑھا سکیں۔ مجھے یقین ہے کہ پاکستان درست سمت پر گامزن ہے۔”
