UrduLead UrduLead
Related Articles
پاکستان سپر لیگ (پی ایس ایل) کے 10ویں ایڈیشن کے ڈرافٹس کی میزبانی پہلی بار بلوچستان کے تاریخی شہر گوادر میں کروائے جانے کا اعلان ہوگیا۔
پی سی بی کی جانب سے جاری کردہ اعلامیے میں کہا گیا ہے کہ پاکستان سپرلیگ کے 10 ویں ایڈیشن کی تیاریاں جاری ہیں،
بلوچستان کا پورٹ سٹی گوادر پی ایس ایل کے پلیئر ڈرافٹ کی میزبانی کرے گا، پلئیر ڈرافٹس کی تقریب 11 جنوری 2025 بروز ہفتہ منعقد ہوگی۔
بلوچستان کے ساحلی شہر میں ڈرافٹنگ کا مقصد اس کی ثقافتی اور اقتصادی اہمیت کو اجاگر کرنا ہے، تقریب میں تمام فرنچائز سیزن 10 کے لیے کھلاڑیوں کو چناؤ کریں گی، پی ایس ایل کا میلہ اپریل مئی میں سجے گا۔
چیئرمین پی سی بی محسن نقوی کا کہنا ہے کہ گوادر، اپنی شاندار ساحلی پٹی اور اسٹریٹجک اہمیت کے ساتھ پاکستان کے معاشی مستقبل کے دل کی حیثیت رکھتا ہے،
یہاں ایچ بی ایل پی ایس ایل پلیئر ڈرافٹ کی میزبانی کرکے ہمارا مقصد اس کی ثقافتی اور اقتصادی اہمیت کو اجاگر کرنا ہے۔
انہوں نے کہا کہ میں 11 جنوری کو خوبصورت شہر گوادر میں تمام فرنچائزز اور متعلقہ اسٹیک ہولڈرز کا خیرمقدم کرنے کا منتظر ہوں کیونکہ ہم پاکستان کے سب سے بڑے کھیلوں کے ایونٹ کے 10ویں ایڈیشن کے آغاز کی طرف ایک اہم قدم اٹھا رہے ہیں۔
ایچ بی ایل پی ایس ایل کے چیف ایگزیکٹو آفیسر سلمان نصیر کا کہنا ہے کہ مجھے گوادر کو پلیئر ڈرافٹ کے میزبان شہر کے طور پر اعلان کرنے پر بہت فخر ہے،
یہ اقدام پی ایس ایل کی رسائی کو پاکستان کے کونے کونے تک پھیلانے اور پاکستان کی خوبصورتی کو دنیا کے سامنے دکھانے کے ہمارے عزم کی عکاسی کرتا ہے۔
پی سی بی نے اپنی پریس ریلیز میں تقریب کے آغاز کا وقت اور مقام شیئر نہیں کیا ہے۔
دوسری جانب اعلامیے میں بتایا گیا ہے کہ کھلاڑیوں کی ریلیگیشن اور ریٹینشن کا اعلان دسمبر کے آخر میں کیا جائے گا۔
آئی سی سی چیمپئنز ٹرافی کی وجہ سے پی ایس ایل 2025 کو 7 اپریل سے 20 مئی تک منعقد کرنے کی تجویز ہے۔
پاکستان کرکٹ بورڈ اور پاکستان سپر لیگ کی 6 فرنچائزز نے ہفتہ 4 مئی 2024 کو جنرل کونسل اجلاس میں پاکستان سپر لیگ 2024 کا تفصیلی جائزہ لینے کے ساتھ ساتھ پاکستان سپر لیگ 2025 کی منصوبہ بندی پر بھی تبادلہ خیال کیا۔
چیمپیئنز ٹرافی کی وجہ سے پی ایس ایل 2025 کا انعقاد اپریل اور مئی میں ہوگا۔
اجلاس میں پاکستان کرکٹ بورڈ نے کہاکہ آئی سی سی چیمپیئنز ٹرافی 2025 کے پی ایس ایل کی روایتی ایونٹ ونڈو میں منعقد ہونے کی وجہ سے پی ایس ایل 2025 ایونٹ کے لیے ایونٹ ونڈو 7 اپریل 2025 سے 20 مئی 2025 تک ہوگی۔
پی سی بی کے مطابق کراچی، لاہور، ملتان اور راولپنڈی پاکستان میں میچوں کی میزبانی کریں گے جس میں ہر ٹیم ہوم گراؤنڈ پر کم از کم 5 میچ کھیلے گی۔ جبکہ بورڈ اضافی مقامات کی تلاش جاری رکھے گا۔
پاکستان کرکٹ بورڈ کے مطابق 4 پلے آف ایک غیر جانبدار وینیو پر منعقد کرنے کی تجویز ہے۔
اجلاس میں ایچ بی ایل پی ایس ایل 2025 کو مزید پرجوش اور مسابقتی بنانے کے ساتھ ساتھ مداحوں کی تعداد کو شامل کرنے اور انہیں بڑھانے کے مقصد سے ایونٹ کی پلیئنگ کنڈیشنز میں کچھ تبدیلیوں کا بھی جائزہ لیا گیا۔
