UrduLead UrduLead
Related Articles
پاکستان کرکٹ ٹیم نے ویسٹ انڈیز کے خلاف دوسرے ٹیسٹ میچ میں 8 وکٹوں کی شاندار فتح حاصل کرتے ہوئے سیریز 1-1 سے برابر کر دی ہے۔
میچ کی تفصیلات کے مطابق میزبان ویسٹ انڈیز کی ٹیم نے پہلی اننگز میں 344 رنز بنائے، جس کے جواب میں پاکستان نے 387 رنز کا مجموعہ اکٹھا کر کے 43 رنز کی برتری حاصل کی۔ ویسٹ انڈیز کی دوسری اننگز محض 117 رنز پر تمام ہوئی، جس کے نتیجے میں پاکستان کو فتح کے لیے 75 رنز کا معمولی ہدف ملا۔
پاکستان نے یہ ہدف صرف 2 وکٹوں کے نقصان پر 77 رنز بنا کر باآسانی حاصل کر لیا اور میچ 8 وکٹوں کے فرق سے اپنے نام کیا۔ اس فتح کے ساتھ ہی پاکستان نے سیریز میں برابری حاصل کر لی ہے،
پہلی اننگز کی طرح اس اننگز میں بھی عبداللّٰہ شفیق ناٹ آؤٹ رہے، انہوں نے 24 رنز کی اننگز کھیلی۔ اس مرتبہ کپتان بابر اعظم بھی ناٹ آؤٹ رہے اور انہوں نے بھی 24 رنز بنائے۔ ان کے علاوہ اذان اویس 18 اور امام الحق 9 رنز بنا کر آؤٹ ہوئے۔
میچ کی پہلی اننگز میں 160 رنز ناٹ آؤٹ بنانے والے عبداللّٰہ شفیق کو میچ کا بہترین کھلاڑی جبکہ سیریز میں 193 رنز بنانے والے بابر اعظم کو سیریز کا بہترین کھلاڑی قرار دیا گیا۔
پورٹ آف اسپین میں ٹیسٹ کے چوتھے روز ویسٹ انڈیز کی ٹیم نے 103 رنز 6 کھلاڑی آؤٹ پر اننگز کا دوبارہ آغاز کیا تو پاکستانی بولرز نے جادوئی گیندبازی سے انہیں قابو کیے رکھا۔
ویسٹ انڈیز کی ٹیم 47 اوور کھیل کر 117 رنز بنانے کے بعد آل آؤٹ ہوگئی۔ ویسٹ انڈیز کے ایک بیٹر برینڈن کنگ زخمی ہونے کے باعث بیٹنگ کےلیے نہ آئے۔
ہوم ٹیم کی جانب سے کیویم ہوج 34 رنز بنا کر نمایاں رہے جبکہ ٹیگنارائن چندرپال اور روسٹن چیز نے 17، 17 رنز بنائے۔
پاکستان کی جانب سے اسپنرز علی عثمان اور ساجد خان نے چار، چار کھلاڑیوں کو پویلین کی راہ دکھائی جبکہ ایک وکٹ فاسٹ بولر محمد علی کے حصے میں آئی۔
ویسٹ انڈیز ٹیم پہلی اننگز میں 344 رنز بنا کر آؤٹ ہوگئی تھی جس کے جواب میں عبداللّٰہ شفیق کے ناقابلِ شکست 160، بابر اعظم کے 88، نوجوان اذان اویس کے 55 اور ساجد خان کے 30 رنز کے بدولت 387 رنز بنائے۔
